1Yaba Jerubbaale, e leng Gideone, o tsoha e sa le hosasa, a ena le setjhaba sohle seo a nang le sona, mme ba emisa sedibeng sa Harode. Diahelo tsa Bamidiane tsona di ne di le ka nqa leboya ho Gideone, pela lerallana la More, lehwatateng.
2Jehova a re ho Gideone: Setjhaba seo o nang le sona se seholo haholo, hoo ke sitwang ho neela Bamidiane matsohong a sona, esere mohlomong Baiseraele ba ithorisa bakeng sa ho rorisa nna, ba re: Re namoletswe ke matsoho a rona. 3Eya jwale, o tsebise setjhaba, o re: Ya tshabang, ya tepeletseng, a kgutle, a tlohe thabeng ya Gileade. Kahoo, ha kgutla banna ba dikete tse mashome a mabedi a metso e mmedi, ha sala ba kete tse leshome.
4Jehova a boela a re ho Gideone: Setjhaba se sa le seholo; se theosetse metsing, ke tle ke o kgethele teng ba tla ya le wena. Eo ke tla o bolella yena, ke re: Enwa a ye le wena, o tla ya le wena; mme e mong le e mong eo ke tla o bolella yena, ke re: Enwa a se ke a ya le wena, ha a na ho ya. 5Yaba Gideone o theosetsa setjhaba metsing, mme Jehova a re ho Gideone: E mong le e mong ya tla qapha metsi ka leleme, jwalokaha ho qapha ntja, o mo kgethe; o kgethe le bohle ba tla kgumama ka mangole ho nwa. 6Mme palo ya ba qaphileng ka matsoho ho isa metsi molomong, ya eba batho ba makgolo a mararo; ba bang kaofela ba kgumama ka mangole ho nwa metsi. 7Jwale Jehova a re ho Gideone: Ke tla le namolela ka batho bana ba makgolo a mararo ba qaphileng, ke neele Bamidiane matsohong a hao ka bona; ba bang bohle ba ipoelle e mong le e mong ha habo. 8Yaba ba makgolo a mararo ba nka mofaho wa setjhaba matsohong a bona le diterompeta tsa sona; Baiseraele ba bang bohle Gideone a ba kgutlisetsa e mong le e mong tenteng ya hae, a thibela batho ba makgolo a mararo. Haele diahelo tsa Bamidiane, di ne di le katlase ho yena, lehwatateng.
9Bosiung bona boo, Jehova a re ho yena: Ema, o theohele diahelong, etswe ke di neetse matsohong a hao. 10Ha o ka tshaba ho theohela teng, o theohele diahelong le ena le Pura, mohlanka wa hao. 11O tla utlwa se bolelwang teng, mme matsoho a hao a tla tiiswa, hore o tle o theohele diahelong. Yaba o theohela teng ba ena le Pura, mohlanka wa hae, a ya moo ho feletseng balebedi ba hlometseng ba diahelo. 12Bamidiane, le Baamaleke, le bana ba Botjhabela kaofela ba ne ba phatlaletse lehwatateng ba le ka ka ditsie, le dikamele tsa bona di se na palo, di le ka ka lehlabathe le lebopong la lewatle. 13Eitse ha Gideone a fihla teng, bonang, motho o ne a phetela molekane wa hae toro, a re: Bona, ke lorile toro; ke bone ho hlaha ntho e kang senkgwana sa harese se thetehela diahelong tsa Bamidiane; sa fihla tenteng, sa e otla, sa e qethosa fatshe, tente ya ba ya rapalla. 14Molekane wa hae a araba, a re: Toro eo ha e bolele letho, haese sabole ya Gideone, mora Joase, monna wa Iseraele. Modimo o neetse Bamidiane le diahelo tsohle matsohong a hae.
15Eitse hobane Gideone a utlwe taba tsa toro le hlalosetso ya yona, a inama, a ntoo kgutlela diahelong tsa Baiseraele, a re: Emang, hobane Jehova o neetse diahelo tsa Bamidiane matsohong a lona. 16A arola ba makgolo a mararo dihlopha tse tharo, a nea e mong le e mong terompeta letsohong la hae, le dinkgo tse feela tse nang le dirumula kahare ho tsona. 17Yaba o re ho bona: Ntadimeng, le etse jwaloka nna. Bonang, etlere ha ke fihla pheletsong ya diahelo, le tle le etse jwalokaha le nna ke tla etsa. 18Etlere ha ke letsa terompeta, nna le bohle bao ke nang le bona, le lona le letse diterompeta ka nqa tsohle ho diahelo, le re: Ka Jehova le Gideone.
19Ha ho le jwalo, Gideone a tsamaya le batho ba lekgolo bao a nang le bona, ba fihla pheletsong ya diahelo, ho sa qalwa tebelo ya bosiu bo boholo, ho sa tswa bewa balebedi. Ba letsa diterompeta, mme ba pshatla dinkgo tse matsohong a bona. 20Yaba dihlopha tse tharo di letsa diterompeta, tsa pshatla dinkgo, mme ba tshwara e mong le e mong serumula ka letsoho le letshehadi, le terompeta ka letsoho le letona, ba di letsa, ba howa, ba re: Sabole ya Jehova le ya Gideone! 21Ba ema e mong le e mong bakeng sa hae, ba teetse diahelo hare, mme bohle ba diahelong ba qala ho titimela mane le mane, ba howa, ba baleha. 22Ba makgolo a mararo ba nna ba letsa diterompeta, mme Jehova a etsa hore e mong le e mong wa Bamidiane a hlabe e mong ka sabole ya hae diahelong tsohle, bohle ba diahelong ba ba ba baleha ho ya fihla Bethe-Shitta, nqa Tserera, le ho ya fihla moeding wa Abele-Mehola, nqa Tabbathe. 23Banna ba Iseraele ba ha Nefthali, le ba ha Asere, le bohle ba ha Manasse ba hlabelwa mokgosi mme ba phallela Bamidiane.
24Gideone a romela manqosa le ho bohle ba thabeng ya Efraime, a re: Theohang ho ya lwantsha Bamidiane, le tshware madiboho pele, ho ya fihla Bethe-Bara, e le madiboho a Jordane. Kahoo, banna bohle ba Iseraele ba phutheha, mme ba tshwara madiboho, ho ya fihla Bethe-Bara, e le madiboho a Jordane. 25Ba tshwara marena a mabedi a Midiane, Orebe le Seebe; ba bolaya Orebe lefikeng la Orebe, Seebe yena ba mmolaya sehatelong sa Seebe ba ntoo phallela Bamidiane. Mme hlooho tsa Orebe le Seebe ba di tlisetsa Gideone mose wane wa Jordane.
