BAAHLODI 10

₁Kamora Abimeleke, ha hlaha Thola, mora Pua, mora Dodo, monna wa Issaskare, ho namolela Iseraele; o ne a ahile Shamire, thabeng ya Efraime. ₂A ahlolela Iseraele ka lemo tse mashome a mabedi a metso e meraro, a ntoo shwa, a patwa Shamire.

₃Kamora hae, ha hlaha Jaire, Mogileade; yena a ahlolela Iseraele ka dilemo tse mashome a mabedi a metso e mmedi. ₄O ne a na le bara ba mashome a mararo, ba kallang diesele tse mashome a mararo; ba ne ba na le metse e mashome a mararo naheng ya Gileade, e reilweng lebitso la Havvoth-Jaire le kajeno. ₅Jaire a shwa, mme a patwa Kamone.

₆Bana ba Iseraele ba boela ba etsa ho leng hobe pela Jehova; ba sebeletsa boBaale le boAshtarothe, le medimo ya Siria, le medimo ya Sidone, le medimo ya Moabe, le medimo ya bana ba Ammone, le medimo ya Bafilesta; ba furalla Jehova, ba lesa ho mo sebeletsa. ₇Yaba kgalefo ya Jehova e tukela Baiseraele, mme a ba rekisetsa matsohong a Bafilesta le matsohong a bana ba Ammone. ₈Ka selemo seo ba tshwenya, ba hatakela bana ba Iseraele hampe; hape ba tshwenya bana ba Iseraele bohle ba leng mose wane wa Jordane, naheng ya Baamore, e leng Gileade, ka dilemo tse leshome le metso e robileng meno e le mmedi. ₉Bana ba Ammone ba tshela Jordane ho ya lwantsha Juda, le Benjamine, le ntlo ya Efraime, mme Baiseraele ba tsieleha haholo ke hona.

₁₀Yaba bana ba Iseraele ba howeletsa ho Jehova, ba re: Re o sitetswe, etswe re furaletse Modimo wa rona, re sebeleditse boBaale. ₁₁Jehova a re ho bana ba Iseraele: Ha ke re, ke se nkile ka le namolela matsohong a Baegepeta, le a Baamore, le a bana ba Ammone, le a Bafilesta na? ₁₂Le mohla le neng le tshwenngwa ke Basidone le Baamaleke le Bamidiane, la howeletsa ho nna, mme ka le namolela matsohong a bona. ₁₃Le mpa le mphuraletse, le sebeleditse medimo esele; ka baka leo, ha ke sa tla hlola ke le namolela. ₁₄Eyang, le howeletse ho medimo eo le ikgethetseng yona, e ke e le namolele nakong ena ya tsietsi ya lona. ₁₅Bana ba Iseraele ba re ho Jehova: Re sitilwe; etsa ka rona kahohle kamoo o ratang kateng; feela, o re namolele kajeno. ₁₆Yaba ba lahla medimo esele e hara bona, mme ba sebeletsa Jehova; Jehova a utlwela Baiseraele bohloko ka baka la tsietsi ya bona.

₁₇Bana ba Ammone ba phutheha, ba tla, ba emisa Gileade; le bona bana ba Iseraele ba phutheha, ba ya, ba emisa Mitspe. ₁₈Yaba batho le baholo ba Gileade ba botsana, ba re: Ke mang ya tla qala ho lwantsha bana ba Ammone na? Ya qalang e tla ba yena hlooho ya bohle ba ahileng Gileade.