ESAIA 7

₁Mehleng ya Akase, mora Jothame, mora Osiase, morena wa Juda, Retsine, morena wa Siria, le Peka, mora Remalia, morena wa Iseraele, ba futuhela Jerusalema, empa ba sitwa ho o thibella.

₂Eitse ha ntlo ya Davida e bolellwa ho thwe, Basiria ba kopane le Baefraime, pelo ya Akase le dipelo tsa batho ba hae tsa sisinyeha, jwaloka difate tsa meru ha di sisinngwa ke moya.

₃Yaba Jehova o re ho Esaia: Tloha jwale, o kgahlanyetse Akase, ho ye wena le Sheare-Jashube, mora hao; le tla mo fumana bofellong ba foro ya metsi a letsha le hodimo, mmileng wa tshimo eo ho hlatsuwang ho yona. ₄Ere ho yena: O itebele, empa o itulele, pelo ya hao e se ke ya fokodiswa ke dirumula tseo tse pedi tse kubellang; se tshabe bohale bo tjhesang ba Retsine, le ba Siria, le ba mora Remalia. ₅Leha Siria le Efraime le mora Remalia ba rerile ho o etsa hampe, ba re: ₆A re futuheleng Juda, re thibelle, re ikgapele motse, re bee mora Tabeele morena wa teng. ₇Morena Jehova o re: Taba eo e ke ke ya etsahala, e ke ke ya hlaha. ₈Hobane motse wa moreneng wa Siria ke Damaseka, mme hlooho ya Damaseka ke Retsine; dilemo tse mashome a tsheletseng le metso e mehlano ha di fetile, Efraime o tla timetswa, ha e sa tla hlola e eba setjhaba. ₉Motse wa moreneng wa Efraime ke Samaria, mme hlooho ya Samaria ke mora Remalia. Ha le sa dumele, ruri le ke ke la tiya.

₁₀Jehova a eketsa a re ho Akase: ₁₁Ikopele pontsho ho Jehova, Modimo wa hao, o kope hore e hlahe tlase lebitleng, leha e le hodimo lehodimong. ₁₂Empa Akase a araba, a re: Nke ke ka kopa letho, nke ke ka leka Jehova. ₁₃Yaba Esaia o re: Utlwang jwale, lona ba ntlo ya Davida: Hleka ke ntho e nyenyane ho lona ho kgathatsa batho, haele moo le kgathatsa le Modimo wa ka na? ₁₄Ka baka leo, Morena o tla le fa pontsho, e le yena: Bonang, morwetsana o tla emola, a tswale mora, mme o tla mo rea lebitso la Emmanuele (Modimo o na le rona). ₁₅O tla ja lebese le dinotshi, a be a tsebe ho hana bobe le ho ikgethela botle. ₁₆Empa ngwana ha a eso ho tsebe ho hana bobe le ho ikgethela botle, lefatshe leo o tshabang marena a lona a mabedi, le tla senyeha.

₁₇Ka morena wa Assiria Jehova o tla o hlahisetsa, wena le setjhaba sa hao, le ntlo ya ntatao, matsatsi ao a jwaloka wona a esong ho bonwe, haesale le mohla Efraime a kgaohaneng le Juda. ₁₈Mehleng eo, Jehova o tla letsetsa dintsintsi tse phellong ya dinoka tsa Egepeta molodi, le dinotshi tse lefatsheng la Assiria. ₁₉Di tla tla, di dule kaofela dikgutlong tse dilomo, le mafarung a mafika, le dihlahleng tsohle, le makgulong wohle. ₂₀Ka tsatsi leo, Morena o tla beola ka lehare leo a le adimileng mose wa noka, ke ho re, ka morena wa Assiria o tla beola hlooho le mohwete wa maoto, a tlose le ditedu. ₂₁Mehleng eo, motho e mong le e mong o tla alosa sethole se le seng le dinku tse pedi. ₂₂Mme kahobane di tla sisa haholo, ba tla ja mafi, hobane e mong le e mong ya siilweng lefatsheng leo o tla ja mafi le dinotshi. ₂₃Mehleng eo, masimo wohle a merara e sekete, e lekaneng dishekele tse sekete, a tla medisa dibajwa le meutlwa. ₂₄Naha eo e tla kenwa ka metsu le diqha, hobane naha kaofela e tla tlala dibajwa le meutlwa. ₂₅Dithaba tsohle tse neng di lengwa ka mehoma, ho ke ke ha hlola ho tsamauwa ho tsona ka baka la ho tshaba dibajwa le meutlwa, empa di tla etswa makgulo a dikgomo, di hatakelwe ke manku.