Boporofeta hodima Tire.
1Boporofeta hodima Tire:
Bokollang, lona dikepe tsa Tarshishe, hobane o senyehile; matlo ha a sa le yo, ha ho sa le moo ho kenwang teng; ba utlwile taba eo e etswa naheng ya Kittime. 2Tshohang, lona ba ahileng naheng e sikang le lewatle, e neng e tlala bahwebi ba Sidone ba haolang ka lewatle! 3Koro ya noka e ntsho e neng e etla ka metsi a maholo, ke re, kotulo ya Nile e ne e le maruo a teng, motse oo e ne e le moo ho rekwang teng ke ditjhaba. 4Swaba, Sidone, hobane lewatle le a bolela, qhobosheane ya lewatle e re: Ha ke tsebe bohloko ba ho beleha, ha ke a beleha; ha ke a ka ka hodisa bahlankana kapa barwetsana. 5Etlare ha taba e fihla Egepeta, ba tla thothomela ke ho utlwa taba tsa Tire. 6Tshelelang Tarshishe! Bokollang, lona ba mabapa le lewatle! 7Na ke wona motse wa lona wa menyaka, oo ho qala ha wona ho isang mehleng ya boholoholo, oo maoto a wona a neng a o isa hole hore o yo haha teng?
8Ke mang ya rerileng taba ena hodima Tire, eo e neng e le moabedi wa meqhaka ya borena, eo bahwebi ba hae e neng e le marena, le ba rekang ha hae e leng ba hlomphuwang lefatsheng? 9Jehova wa makgotla ke yena ya rerileng taba eo, a tla fokotse kganya ya boholo bohle, le ho apesa bohle ba hlomphuwang lefatsheng ka nyatso. 10O haole ka naha ya hao, jwaloka Nile, wena, moradi wa Tarshishe; ha ho sa le joko e o tlamileng. 11O otlolletse letsoho la hae hodima lewatle, o sisintse mebuso; Jehova o laetse bakeng sa Kanana, hore ho heletswe diqhobosheane tsa teng. 12O itse: Ha o sa tla thaba, wena morwetsana ya senyehileng, moradi wa Sidone! Tsoha, o ikele Kittime, o tshelele teng; empa le teng o ke ke wa bona phomolo. 13Bona naha ya Bakalde! Ha e sa le setjhaba; Baassiria ba e neetse dibatana tsa naha; ba haha ditora tsa bona tsa ntwa, ba heletsa matlo a borena a Kanana, ba a etsa lesupi. 14Bokollang, lona dikepe tsa Tarshishe, hobane qhobosheane ya lona e senyehile.
15Mehleng eo, Tire o tla lebalwa ka dilemo tse mashome a supileng, tse lekanang matsatsi a ho phela ha morena a le mong; dilemo tse mashome a supileng ha di fetile, Tire o tla hlahelwa ke taba ya pina ya seotswa, e reng: 16Nka harepa, seotswa se lebetsweng, o qete diterata tsa motse ka yona, o tee molodi o motle, o eketse dipina tsa hao, o tle o hopolwe. 17Dilemo tse mashome a supileng ha di se di fetile, Jehova o tla hopola Tire; o tla kgutlela maruong a manyala a hae, a iketse seotswa mebusong yohle e bophareng ba lefatshe. 18Empa leruo la hae le moputso wa hae di tla kgethelwa Jehova, di ke ke tsa bokellwa hammoho, leha e le ho bolokwa, empa leruo la hae le hwebilweng e tla ba la ba emang pela Jehova, ba tle ba kgore hantle, mme ba apeswe ka bokgabane.
