Ho wa ha Babilona.
1Boporofeta hodima lehwatata la lewatle:
O a tla jwaloka sefefo se tsohang ka nqa borwa, o tswa lefeelleng, lefatsheng le tshabehang. 2Ke bontshitswe pono e tshabehang: Mohapi o a hapa, mosenyi o a senya. Nyoloha, Elame! wena Media, o lokise ntwa! Ke fedisa masisapelo wohle. 3Matheka a ka a tshwerwe ke bohloko ke hona, matswalo a nkene, a jwaloka matswalo a mosadi ya belehang; ke a sonopana, ke sitwa ho utlwa; ke tshohile, ke sitwa ho bona. 4Pelo ya ka e ferekane; letsoso le lebe le ntshwere; bosiu ba thabo ya ka bo fetohile bosiu ba tshoho. 5Dijo di bewa tafoleng; molebedi o a lebela; ba ja, ba nwa ... Tlohang, le eme, lona marena; kwetlisang dithebe!
6Hobane Morena o itse ho nna: Bea sebohodi, se bolele seo se se bonang. 7Se bone dipere le bakalli ba tsona ba tsamaya ka bobedi, se bone le diesele le dikamele; sa nna sa thea tsebe, sa mamela ka ho ela hloko haholo. 8Yaba se howa jwaloka tau, sa re: Morena, ke ntse ke eme motshehare wohle toreng, ke ntse ke tiisa ho lebela ka masiu wohle. 9Bonang, ho hlahile dipere le bakalli ba tsona ba tsamayang ka bobedi. Sa eketsa sa re: O wele, Babilona o wele; ditshwantsho tsohle tsa medimo ya hae di bolaetswe fatshe.
10Oho, setjhaba sa ka se hatakelwang jwaloka koro seotlong, tseo ke di utlwileng ho Jehova wa makgotla, Modimo wa Iseraele, ke le boleletse tsona.
Boporofeta hodima Duma.
11Boporofeta hodima Duma:
Mohoo o tswang Seire o fihlile ho nna, o re: Sebohodi, nako ya bosiu ke efe? Sebohodi, nako ya bosiu ke efe? 12Sebohodi se re: Meso e a hlaha, ho ntoo ba bosiu. Ha le rata ho botsa, botsang! Sokolohang, le boye.
Boporofeta hodima Arabia.
13Boporofeta hodima Arabia:
Le hlola bosiu masabasabeng a Arabia, lona dihlopha tsa baeti ba Dedane. 14Isang metsi ho ba nyorilweng! Ba ahileng Thema ba nke dijo ho ya kgahlanyetsa ka tsona ba balehang. 15Hobane ba baleha pela marumo, pela marumo a tsomotsweng, pela diqha tse tjhehilweng, le pela ntwa e thata. 16Hobane Morena o itse ho nna: Ho sa setse selemo se le seng, se kang selemo sa ya sebeletsang leruo, mme kganya yohle ya Kedare e tla fela. 17Mosala wa ba diqha, wa bahale ba bana ba Kedare, o tla ba monyenyane, hobane Jehova, Modimo wa Iseraele, o boletse.
