GENESE 17

₁Eitse ha Abrame e se e le motho ya dilemo tse mashome a robileng mono o le mong a metso e robileng mono o le mong, Jehova a iponahatsa ho Abrame, a re ho yena: Ke nna Modimo o matla wohle. Tsamaya pela ka, o be kgabane; ₂mme ke tla tiisa selekane sa ka, se mahareng a ka le wena, ke o atise haholoholo. ₃Yaba Abrame o wa ka sefahleho, mme Modimo wa nna wa bua le yena, wa re: ₄Haele nna, bona, selekane sa ka se ho wena, mme o tla ba ntata letshwele la ditjhaba. ₅Lebitso la hao ha ho sa tla thwe ke Abrame (ntate ya phahameng), empa lebitso la hao e tla ba Abrahama, hobane, ke o beile hore o be raditjhabatjhaba. ₆Ke tla o atisetsa bana haholoholo, ke o etse ditjhaba, mme marena a tswe ho wena. ₇Ke tla tiisa selekane sa ka, se mahareng a ka le wena, le ditloholo tsa hao tse o hlahlamang ka meloko ya tsona, e be selekane se sa feleng, ke be Modimo wa hao le wa leloko la hao le o hlahlamang. ₈Mme lefatshe la bojaki ba hao, lefatshe lohle la Kanana, ke le nea wena le ditloholo tsa hao tse kamora hao, le le rue ka ho sa feleng, mme ke tla ba Modimo wa bona.

₉Modimo wa ba wa re ho Abrahama: Haele wena, o boloke selekane sa ka, wena le ditlholo tsa hao tse kamorao ho wena. ₁₀Ke wena selekane sa ka seo le tlang ho se boloka, se mahareng a ka le lona, le ditloholo tsa hao tse kamora hao: Ba batona bohle ho lona ba bolotswe. ₁₁Le pome nama ya ntlha ya dipele tsa lona, mme e tla ba pontsho ya selekane sa ka le lona. ₁₂Ngwana ya matsatsi a robileng meno e le mmedi hara lona a bolotswe, ba batona kaofela melokong ya lona, ya tswallwang tlung, leha e le ya rekilweng ka tjhelete ho moditjhaba ofe le ofe, eo e seng wa mofuta wa hao. ₁₃Ho bolotswe ya tswallwang tlung ya hao, le ya rekwang ka tjhelete ya hao, selekane sa ka se be nameng ya lona, e be selekane se sa feleng. ₁₄Motho e motona wa leqai ya sa bolotswang nameng ya hae, motho eo o tla kgaolwa setjhabeng sa hae, hobane o sentse selekane sa ka.

₁₅Hape Modimo wa re ho Abrahama: Sarai, mosadi wa hao, ha a sa tla hlola a bitswa ka lebitso la Sarai (ya ikgethang), empa lebitso la hae e tla ba Sara (mofumahadi). ₁₆Mme ke tla mo hlohonolofatsa, hape ke tla o fa mora ka yena; mme ke tla mo hlohonolofatsa, e tla ba mma ditjhaba, mme marena a ditjhaba a tla tswa ho yena. ₁₇Yaba Abrahama o wa ka sefahleho, a tsheha, mme a re ka pelong ya hae: Na monna ya dilemo tse lekgolo a ka bona ngwana, le Sara ya dilemo tse mashome a robileng mono o le mong, hleka a ka beleha na? ₁₈Abrahama a re ho Modimo: Ishmaele a ke a phele pela hao! ₁₉Modimo wa re: Tjhe, Sara, mosadi wa hao, o tla o tswalla mora, mme o tla mo rea lebitso la Isaaka; ke tla tiisa selekane sa ka le yena, le leloko la hae le kamora hae, e be selekane se sa feleng. ₂₀Haele bakeng sa Ishmaele, ke o utlwile: Bona, ke tla mo hlohonolofatsa, ke mo atise, ke mo ngatafatsa haholoholo; o tla tswala marena a leshome le metso e mmedi, mme ke tla mo etsa setjhaba se seholo. ₂₁Empa selekane sa ka ke tla se tiisa le Isaaka, eo Sara a tlang ho o tswalla yena isao, wona motsotsong ona. ₂₂Yaba o lesa ho bua le yena, mme Modimo wa myoloha, wa tloha ho Abrahama.

₂₃Yaba Abrahama o nka Ishmaele, mora wa hae, le bohle ba tswaletsweng tlung ya hae, le bohle ba rekilweng ka tjhelete ya hae, ba batona bohle ba ntlo ya Abrahama, a ba bolotsa ka lona letsatsi leo, kamoo Modimo o mmoleletseng kateng. ₂₄Abrahama e ne e le motho ya dilemo tse mashome a robileng mono o le mong a metso e robileng mono o le mong, mohla a bolotswang; ₂₅mme Ishmaele, mora hae, o ne a na le dilemo tse leshome le metso e meraro, mohla a bolotswang. ₂₆Ka lona tsatsi leo, Abrahama a bolla le Ishmaele, mora hae, ₂₇le banna bohle ba tswaletsweng tlung ya hae, le ba rekilweng ka tjhelete ho baditjhaba, ba bolla le yena.