ESDRASE 3

₁Mohla ho thwasang kgwedi ya bosupa, bana ba Iseraele ba ne ba se ba le metseng ya bona. Yaba ke ha setjhaba se phuthehela Jerusalema jwaloka hoja ke motho a le mong.

₂Teng, Joshua, mora Jotsadake, le banababo e leng baprista, le Sorobabele, mora Salathiele, le banababo, ba ema, ba haha aletare ya Modimo wa Iseraele, ho hlabela mahlabelo a ditjheso ho yona, ka ho ya ka se ngodilweng molaong wa Moshe, monna wa Modimo. ₃Ba tsosa aletare setsheng sa yona, leha ba ne ba ntse ba tshohile ditjhaba tse dinaheng tse ka mathoko, mme teng ba hlabela Jehova mahlabelo a ditjheso, e leng ditjheso tsa hosasa le tsa mantsiboya. ₄Ba etsa le mokete wa Metlotlwane ka ho ya ka se ngodilweng, le ditjheso tsa tsatsi le leng le le leng ka palo ya tsona le ka taelo ya tsona; ka tsatsi le leng le le leng ha etswa se sa lona. ₅Hape, ha etswa setjheso sa mehla, le sa kgwedi ha e thwasa, le sa mekete yohle e halalelang ya Jehova, le sa motho ka mong ya ratang ho hlabela Jehova sehlabelo. ₆Ho qala ka tsatsi la pele la kgwedi ya bosupa, ba hla ba qala ho hlabela Jehova mahlabelo a ditjheso; empa ke ha tempele ya Jehova e eso ho thewe. ₇Yaba ba ntshetsa dibetli tsa majwe le tsa difate ditjhelete; ba nea Basidone le Batire dijo le dino le ole, ba re, ba ye ho lata difate tsa dikedare Lebanone, mme ba di tlise Jafo ka lewatle, kamoo ba dumeletsweng ke Siruse, morena wa Persia kateng.

₈Selemong sa bobedi sa ho fihla ha bona tlung ya Modimo o Jerusalema, ka kgwedi ya bobedi, Sorobabele, mora Salathiele, le Joshua, mora Jotsadake, le banababo bona ba bang bao e leng baprista le Balevi, le bohle ba neng ba kgutletse Jerusalema ba etswa kgolehong, ba qala ho sebetsa. Ha bewa Balevi ba dilemo tse mashome a mabedi le ba kapele hore ba tsamaise mosebetsi wa ntlo ya Jehova. ₉Kahoo, Joshua, le bara ba hae le banababo, le Kadmiele le bara ba hae, e leng bana ba Juda, ba ema jwaloka eka ke motho a le mong, hore ba tsamaise ba etsang mosebetsi wa ntlo ya Modimo, ba ena le bara ba Henadade, le bara ba bona le banababo, e leng Balevi.

₁₀Eitse ha ba hahang ba thea metheo ya tempele ya Jehova, baprista ba emiswa ba apere tsa bona, ba tshwere diterompeta, ba ena le Balevi, bana ba Asafe, ba tshwere disimbala ho rorisa Jehova, ba ntse ba eya ka ditaelo tsa Davida, morena wa Iseraele. ₁₁Ba dumelana ba ntse ba rorisa, ba boka Jehova, ba re: Hobane o molemo, hobane mohau wa hae ho Iseraele ke o sa feleng. Setjhaba sohle sa etsa ditlatse tse kgolo tsa ho rorisa Jehova ka taba ya hobane ho thewa metheo ya ntlo ya Jehova. ₁₂Baprista ba bangata, le Balevi, le dihlooho tsa matlo a bontata Baiseraele, e leng maqheku a neng a bone ntlo ya pele, ba lla, ba bokolla, ha ba bona ho bewa metheo ya ntlo eo pela mahlo a bona; hape, ba bangata ba etsa ditlatse tsa thabo; ₁₃ho se motho hara setjhaba ya ka kgethang modumo wa ditlatse tsa thabo ho modumo wa ho lla ha setjhaba; hobane setjhaba se ne se etsa ditlatse tse kgolo, tseo modumo wa tsona o neng o utlwahala hole.