1Yaba o boela a ntlisa monyakong wa sehalalelo o kantle, o tadimileng ka nqa botjhabela; mme o ne o kwetswe. 2Yaba Jehova o re ho nna: Monyako oo o tla nne o kwalwe; o ke se ke wa bulwa, ha ho motho ya tla kena ka wona, hobane Jehova, Modimo wa Iseraele, o kene ka wona; o tla nne o kwalwe. 3Haele morena, morena yena o tla dula teng ho jela bohobe teng pela sefahleho sa Jehova. O tla kena ka tsela ya mathule a monyako, a boele a tswe ka tsela yona eo.
4Yaba o nkisa pela ntlo, ka monyako o ka nqa leboya; ha ke tadima, ka bona kganya ya Jehova e tletse ntlo ya Jehova, mme ka ikakgela fatshe ka sefahleho sa ka. 5Jehova a re ho nna: Mora motho, sekehetsa pelo ya hao, o bone ka mahlo a hao, o mamele ka ditsebe tsa hao tsohle tseo ke o bolellang tsona tsa dikomelo tsa ntlo ya Jehova le tsa melao ya yona; o e sekehele pelo hore o hlokomele hohle ho kenang tlung, ka menyako yohle ya sehalalelo. 6Mme o bolelle baikgantshi bano, ntlo ya Iseraele, o re: Morena Jehova o re: Manyala wohle a lona a lekane, ntlo ya Iseraele, 7ao ka wona le nnileng la kenya bara ba baditjhaba, bao e leng maqai dipelong le maqai nameng, sehalalelong sa ka ho se silafatsa, e leng ntlo ya ka, ha le ne le hlahisa bohobe ba ka, mafura le madi, hore ba tlole selekane sa ka ka ho ya ka manyala wohle a lona. 8Ha le a ka la boloka ntho tsa ka tse halalelang tseo ke neng ke di beile matsohong a lona, la mpa la bea baditjhaba bao ho ba etsa balebedi sehalalelong sa ka, ba ntho tseo ke di beileng ho lona, tulong tsa lona. 9Ha ho le jwalo, Morena Jehova o re: Ha ho mora wa moditjhaba, eo e leng leqai pelong le leqai nameng, ya tla kena sehalalelong sa ka; ke bolela bara ba baditjhaba ba dutseng hara bana ba Iseraele. 10Haele Balevi ba mphuruletseng mohla Baiseraele ba kgelohang, ba nkgelohang ho ya latela ditshwantsho tsa bona, ba tla jara bokgopo ba bona. 11Ba tla tshwara tshebeletso ya ka sehalalelong sa ka, e be balebedi ba menyako ya ntlo ya ka, le ba etsang tshebeletso ya ntlo; ba tla hlaba ditjheso le mahlabelo a setjhaba, mme ba tla ema pela bona ho ba etsetsa tsa tshebeletso ena. 12Hobane ba kile ba ba etsetsa tshebeletso ya ditshwantsho tsa bona, ya eba kgopiso ya bokgopo ho ntlo ya Iseraele; ka baka leo, nkile ka ba emisetsa letsoho la ka, ho bolela Morena Jehova, mme ba tla jara bokgopo ba bona. 13Ba ke ke ba atamela pela ka ho sebetsa tsa boprista ba ka le ho atamela pela dintho tsa ka tse halalelang sehalaledisisong; empa ba tla jara molato wa sekgobo sa bona le manyala a bona ao ba a entseng; 14ke tla ba bea balebedi ba dintho tseo ke di beileng ka tlung, ho sebetsa mosebetsi wohle wa ntlo le tsohle tse tshwanetseng ho etswa ho yona.
15Haele baprista ba Balevi, bara ba Tsadoke, ba bolokileng tseo ke di beileng sehalalelong sa ka, ha bana ba Iseraele ba ne ba nkgelohile, bona ba tla atamela pela ka ho etsa tshebeletso ya ka, ba eme pela sefahleho sa ka ho bea mafura le madi pela ka: ho bolela Morena Jehova. 16Bona ba tla kena sehalalelong sa ka, ba atamele pela tafole ya ka ho ntshebeletsa, ba boloke tseo ke di beileng. 17Etlare ha ba kena ka menyako ya lebala le kahare, ba tla apara meaparo ya lene; ba se ke ba apara boya ha ba sebetsa menyakong ya lebala le kahare le ka tlung. 18Ba tla rwala dikatiba tsa lene dihloohong tsa bona, ba tene marikgwana a lene mathekeng a bona; ba se ke ba tena se ka ba fufuletsang. 19Leha ba tswela lebaleng le kantle, ke re lebaleng le kantle la setjhaba, ba tla hlobola diaparo tsa bona tseo ba sebetsang ka tsona, ba di bee dikamoreng tse halalelang, ba apare meaparo esele, hore ba se ke ba halaletsa setjhaba ka meaparo ya bona. 20Ba se ke ba beola dihlooho tsa bona, le hona ba se ke ba hodisa moriri wa bona; ba mpe ba ikute dihlooho. 21Ha ho moprista ya tla nwa veine, ha a kena lebaleng le kahare. 22Ba se ke ba nyala mosadi wa mohlolohadi, kapa mosadi ya hladilweng; ba mpe ba nyale barwetsana ba lesika la ntlo ya Iseraele, kapa mosadi wa mohlolohadi e bileng mohlolohadi wa moprista. 23Ba tla ruta setjhaba sa ka ho kgethahanya se halalelang le se sa halalelang, ba se lemose ho kgetha se sa hlwekang ho se hlwekileng. 24Dinyeweng ba tla ema, ba ahlole ka dikahlolo tsa ka, ba ahlole jwalo; meketeng ba tla boloka melao ya ka le dikomelo tsa ka, ba halaletse Disabatha tsa ka. 25Moprista a se ke a atamela pela setopo, hore a se ke a itshela ditshila; empa haele setopo sa ntatae, le sa mmae, le sa mora, le sa moradi, le sa ngwanabo, le sa kgaitsedie ya neng a se na monna, a ka itshilafatsa ka sona. 26Etlare hobane a itlhatswe, a ballwe matsatsi a supileng. 27Ka letsatsi leo a tla kena sehalalelong, lebaleng le kahare, ho sebetsa sehalalelong, o tla hlaba sehlabelo sa hae sa sebe: ho bolela Morena Jehova.
28Ba tla ba le lefa; lefa la bona ke nna; le se ke la ba nea leruo la naha Iseraeleng; leruo la bona ke nna. 29Nyehelo, sehlabelo sa sebe, le sehlabelo sa molato, ba tla di ja, mme ntho tsohle tse entsweng anathema Iseraeleng e tla ba tsa bona. 30Dilopotsiya tsa ditholwana tsa pele tsa ntho tsohle, le dikabelo tsohle tseo le di abelang Modimo, e tla ba tsa baprista; le tla nea baprista le hlama ya lona ya pele, hore le tlise lehlohonolo matlung a lona. 31Baprista ba se ke ba eja nama ya ntho tse shweleng, leha e le ya ntho tse harotsweng tsa dinonyana, kapa tsa diphoofolo.
