EKSODA 30

₁O etse aletare ho tjhesetsa dibano teng, o e etse ka fate sa leoka. ₂Bolelele ba yona e be ba tswe se le seng, bophara le bona e be tswe se le seng; e be le mahlakore a mane a lekanang; bophahamo ba yona e be tswe tse pedi. ₃Manaka a yona e be ntho e le nngwe le yona. O e manehe ka kgauta e hlwekileng, kahodimo le kahohle mahlakoreng le manakeng; o e etsetse mofapo wa kgauta o e potolohang. ₄O e etsetse mehwele e mmedi ya kgauta tlasa mofapo, mahlakoreng a yona a mabedi; o etse jwalo mahlakoreng a mabedi; mehwele eo e be ya ho kenya mejaro, eo e jarwang ka yona. ₅O etse mejaro ya sefate sa leoka, o e manehe ka kgauta. ₆O tla bea aletare malebana le lesira le pela areka ya bopaki, ho tadimana le sekwahelo se hodima bopaki, e leng moo ke tla teana le wena teng. ₇Aarone a tjhesetse ho yona ka hosasa ho hong le ho hong dibano tse monko o monate; a di tjhese ha a lokisa dilampi. ₈Etlare ha Aarone a hoteditse dilampi mantsiboya, a tjhese dibano; e tla ba dibano tse sa feleng pela Jehova, melokong ya lona. ₉Le se ke la tjhesetsa teng dibano disele, kapa setjheso, kapa nyehelo, mme le se ke la etsa ditshelo teng. ₁₀Aarone a tle a etse pheko manakeng a aletare hang ka selemo se seng le se seng; a etse pheko teng hang ka selemo, melokong ya lona, ka madi a sehlabelo sa sebe. E tla ba ntho e kgethehileng haholo ho Jehova.

₁₁Hape, Jehova a bolella Moshe, a re: ₁₂Etlare ha o bala bana ba Iseraele ho tseba palo ya bona, e mong le e mong a tle a ntshetse moya wa hae topollo, pela Jehova, mohla ba balwang, hore ba se ke ba welwa ke bolwetse, mohla ba balwang. ₁₃Bohle ba balwang ba tla ntsha hona: ba ntshe halofo ya shekele (ka ho ya ka shekele ya sehalalelo, e leng shekele e nang le gera tse mashome a mabedi), ke re, halofo ya shekele, e be kabelo e abelwang Jehova. ₁₄Mang le mang ya balwang, ho tloha ho ya dilemo tse mashome a mabedi le ho ya pele, o tla ntsha kabelo e abelwang Jehova. ₁₅Morui a se ke a eketsa, mme mofutsana a se ke a fokotsa halofo ya shekele ka letho, ha ho ntshwa kabelo e newang Jehova, ho etsa topollo ya meya ya lona. ₁₆O nke tjhelete tsa topollo tse ntshwang ke bana ba Iseraele, o di ntshetse tshebeletso ya tente ya pokano; e tla ba kgopotso ho bana ba Iseraele pela Jehova, ha ho etsetswa meya ya lona topollo.

₁₇Jehova a boela a bolella Moshe, a re: ₁₈O etse morifi wa koporo o nang le sedulwana sa koporo ho itlhatswetsa ho wona, o o bee mahareng a tente ya pokano le aletare; o tshele metsi, ₁₉hore Aarone le bara ba hae ba tle ba itlhatswe matsoho le maoto teng. ₂₀Etlare ha ba etla tenteng ya pokano, ba itlhatswe ka metsi, ba tle ba se ke ba eshwa; ba itlhatswe hape, ha ba atamela aletareng ho etsa tshebeletso, ho tjhesa sehlabelo se tjhesetswang Jehova. ₂₁Ba itlhatswe matsoho le maoto, ba tle ba se ke ba eshwa; hoo e tla ba taelo ya kamehla ho bona, ke re, ho Aarone le ditloholo tsa hae, melokong ya bona.

₂₂Hape, Jehova a bolella Moshe, a re: ₂₃O nke dibano tse kgethehileng, tsa mirra e metsi tse boima ba dishekele tse makgolo a mahlano le halofo ya boima bo kalo ya sinnamone e monko o monate, e leng dishekele tse makgolo a mabedi a mashome a mahlano, le lehlaka le monko o monate le boima ba dishekele tse makgolo a mabedi a mashome a mahlano, ₂₄le dishekele tse makgolo a mahlano tsa kasia, ha ho lekanngwa ka shekele ya sehalalelo, le tekanyo ya hine ya ole ya mohlwaare. ₂₅Ka tseo, o tla etsa ole ya setlolo e kgethehileng, tswako e monko o monate, e entsweng ka mokgwa wa motswaki wa tse nkgang hamonate. E tla ba ole ya setlolo e kgethehileng. ₂₆Ka yona, o tla tlotsa tente ya pokano le areka ya bopaki, ₂₇le tafole le mesebetsi yohle ya yona, le kandelare le mesebetsi yohle ya yona, le aletare ya dibano, ₂₈le aletare ya ditjheso le mesebetsi yohle ya yona, le morifi le sedulwana sa wona. ₂₉O di kgethe e be dintho tse kgethehileng haholo; tsohle tse tla di ama di tla kgetheha le tsona. ₃₀O tlotse Aarone le bara ba hae, mme o ba kgethe hore ba etse mosebetsi wa boprista pela ka. ₃₁O bolelle bana ba Iseraele, o re: ₃₂Ke yona ole ya setlolo e kgethehileng ho nna melokong ya lona; e se ke ya tshelwa nameng ya motho, mme le se ke la etsa e tshwanang le yona ho tswakweng ha yona. E kgethehile, le ho lona e kgethehile. ₃₃Mang le mang ya ka etsang ditlolo tse jwalo, kapa ya ka tlotsang moditjhaba ka tsona, a kgaolwe tjhabeng sa habo.

₃₄Hape, Jehova a re ho Moshe: O nke ntho tse monko o monate, setakte, le dikgetla tse monko o monate, le kgalbano, le dibano tse hlwekileng; di ke di lekane ka boima; ₃₅o di etse dibano tse monko o monate, ka mokgwa wa motswaki wa tse monko o monate, di be letswai, hape e be tse hlwekileng, tse kgethehileng. ₃₆O di tudisise haholo, o di bee pela bopaki, tenteng ya pokano, moo ke tla teana le wena teng; ho lona e tla ba ntho e kgethehileng haholo. ₃₇Ha o etsa dibano tseo, le se ke la iketsetsa tse tswakilweng ka mokgwa oo; ho wena e be tse kgethetsweng Jehova. ₃₈Mang le mang ya ka etsang tse jwalo ho di fofonela, a kgaolwe tjhabeng sa habo.