MOEKLESIA 3

₁Ntho e nngwe le e nngwe e na le sebaka sa yona, mme nako e teng ya tsohle tse etswang tlasa letsatsi: ₂nako e teng ya ho tswalwa, e teng nako le ya ho shwa; nako e teng ya ho hloma, e teng nako le ya ho fothola se hlomilweng; ₃nako e teng ya ho bolaya, e teng nako le ya ho fodisa; nako e teng ya ho qhaqholla, e teng nako le ya ho haha; ₄nako e teng ya ho lla, e teng nako le ya ho tsheha: nako e teng ya ho bokolla, e teng nako le ya ho hobela; ₅nako e teng ya ho betsa majwe, e teng nako le ya ho thonaka majwe; nako e teng ya ho aka, e teng nako le ya ho lesa ho aka; ₆nako e teng ya ho batla, e teng nako le ya ho lahlehelwa; nako e teng ya ho boloka, e teng nako le ya ho lahla; ₇nako e teng ya ho hahola, e teng nako le ya ho roka; nako e teng ya ho kgutsa, e teng nako le ya ho bua; ₈nako e teng ya ho rata, e teng nako le ya ho hloya; nako e teng ya ntwa, e teng nako le ya kgotso.

₉Ya sebetsang o ruang ka mosebetsi oo a ikgathatsang ka wona? ₁₀Ke lemohile mesebetsi eo Modimo o e neileng bana ba batho hore ba ikgathatse ka yona. ₁₁O entse tsohle di le ntle nakong ya tsona; o bile o beile lefatshe lohle pela bona hore ba lemohe ditaba tsa lona; leha ho le jwalo, ha ho motho ya utlwisisang mesebetsi e entsweng ke Modimo, ho qala qalong ya yona ho isa qetellong ya yona. ₁₂Kahoo, ke lemohile hobane ha ho letho le ka bang molemo ho bona, haese ho itumela le ho iketsetsa boiketlo ka tshiu tsa bophelo ba bona; ₁₃ke lemohile hape, hoba, ereha motho a eja dijo, kapa a enwa le ho latswa boiketlo ka mokgathala wohle wa hae, le teng e sa le neo ya Modimo. ₁₄Ke lemohile hobane tsohle tse entsweng ke Modimo di hloleha ka ho sa feleng; ha ho se ka eketswang ho tsona, ha ho le se ka kgaolwang; mme Modimo o sebetsa jwalo hore tshabo e be teng ho batho pela wona. ₁₅Se hlahang jwale se se se kile sa eba teng, mme se tlang ho hlaha se ne se ntse se le teng le kgale, mme Modimo o boela o hlahisa se neng se se se fetile.

₁₆Ka boela ka tadima tlasa letsatsi, ka bona bokgopo bo le teng nqalong ya kahlolo, le tulong tsa ho loka ka bona bokgopo. ₁₇Ka ba ka re pelong ya ka: Modimo o tla ahlolela ya lokileng le e mobe, etswe merero yohle le mesebetsi yohle e beetswe nako ya yona. ₁₈Ka boela ka re pelong ya ka: Taba di jwalo ka baka la bana ba batho; Modimo o a ba leka, hore ba bone hoba ba ntse ba tshwana le diphoofolo. ₁₉Hobane kotsi e hlahelang bana ba batho, e jwalo e hlahela le diphoofolo: bobedi ba bona bo hlahelwa ke kotsi e le nngwe. Mokgwa oo motho a shwang ka wona, le yona phoofolo e shwa jwalo; moya wa bohle o mong; ha ho kamoo motho a fetanang le phoofolo kateng, etswe tsohle e le lefeela. ₂₀Tsohle di ikela nqalong e le nngwe; tsohle di tswa leroleng, mme tsohle di kgutlela leroleng. ₂₁Ke mang ya tsebang haeba moya wa bana ba batho o nyolohela hodimo, kapa ha moya wa phoofolo o theohela tlase lefatsheng? ₂₂Ha ho le jwalo, ka bona hobane ha ho molemo o fetang wa hore motho a thabele mesebetsi ya hae, hobane ke yona kabelo eo a e abetsweng. Hobane a ka latwa ke mang, hore a tle ho bona se tla hlaha a se a le siyo?