DEUTERONOMA 24

₁Etlere motho ha a nkile mosadi, a mo nyetse, ha a sa kgahliswe ke yena, kahobane a fumane taba e mpe ho yena, a ke a mo ngolle lengolo la tlhalo, a le bee letsohong la mosadi eo, mme a mo kgutlise tlung ya hae. ₂Etlare hobane mosadi a tswe tlung ya hae, o tla ikela, a be le tokelo ya ho nyalwa ke monna e mong. ₃Ha monna eo wa morao a mo hloya, mme a mo ngolla lengolo la tlhalo, a mo nea lona letsohong la hae, mme a mo kgutlisa tlung ya hae; kapa leha mohlomong ho eshwa monna ya mo nkileng morao ho mo etsa mosadi wa hae; ₄monna eo wa pele, ya mo hladileng, a ke ke a boela a mo nka ho mo etsa mosadi wa hae, ha mosadi a se a silafaditswe; hobane hoo ke manyala pela Jehova; lefatshe leo Jehova, Modimo wa hao, a o fang lona ho le rua, o se ke wa le jarisa sebe.

₅Etlere motho ha a sa tswa nyala mosadi, a se ke a ya ntweng, mme a se ke a jariswa mosebetsi o mong. O tla newa sebaka sa ho itulela hae selemo, a thabise mosadi eo a mo nyetseng.

₆Ho se ke ha eba motho ya nkang lelwala, leha e le tshilo e silang, ho e etsa tebeletso; hobane ke ho nka bophelo ba motho ho bo etsa tebeletso.

₇Ekare ha o fumana motho ya utswitseng e mong wa banababo, e mong wa bana ba Iseraele, mme a mo entse lekgoba, kapa a rekile ka yena, leshodu leo le ke le shwe; ho tloswe bobe haeno jwalo.

₈Lemoha lefu la lepera, o tle o hlokomele ho etsa tsohle tseo baprista ba Balevi ba tla le ruta tsona. Itiseng, le etse ka tseo ke ba laetseng tsona. ₉Hopola seo Jehova, Modimo wa hao, a se entseng Miriame, tseleng, ha le sa tswa tloha Egepeta.

₁₀Ha o namelwa dintho tse ding ke ngwaneno, o se ke wa kena tlung ya hae. ₁₁O mpe o eme kantle, mme motho ya o nametseng, o tla o tlisetsa tebeletso kantle. ₁₂Ekare ha e le motho ya fumanehileng, o se ke wa robala o ena le tebeletso ya hae; ₁₃o mpe o busetse tebeletso ho yena, ha letsatsi le dikela, a tle a robale ka kobo ya hae, mme a o hlohonolofatse; ho wena hoo e tla ba ho loka pela Jehova, Modimo wa hao.

₁₄O se ke wa ja mothoduwa, ya fumanehileng, ya hlokang, kapa e leng e mong wa banabeno, kapa e leng wa baditjhaba ba ahileng naheng ya hao le metseng ya hao. ₁₅Ha letsatsi le eso ho dikele o tle o mo nee moputso wa hae wa letsatsi leo a sebeditseng ka lona; hobane ke mofumanehi, mme pelo ya hae e lebeletse moputso; o mo nee, esere mohlomong a howeletsa ho Jehova ka baka la hao, mme sebe sa eba teng ho wena.

₁₆Bontata bana ba se ke ba bolawa ka baka la bana ba bona, le bana ba se ke ba bolawa ka baka la bontata bona; e mong le e mong a bolaelwe sebe seo e leng sa hae.

₁₇O se ke wa kgopamisa nyewe ya moditjhaba, leha e le ya kgutsana, mme o se ke wa nka kobo ya mosadi wa mohlolohadi ho e etsa tebeletso. ₁₈O mpe o hopole hobane o bile mofo Egepeta, le hobane Jehova, Modimo wa hao, o o lopolotse teng; ke ka baka leo ke o laelang ho etsa jwalo.

₁₉Etlere ha o hela koro masimong a hao, ha o lebetse ngata e nngwe tshimong, o se ke wa kgutlela ho ya e nka; e ke e tlohellwe moditjhaba, le kgutsana, le mosadi wa mohlolohadi, hore Jehova, Modimo wa hao, a o hlohonolofatse mesebetsing yohle ya matsoho a hao. ₂₀Etlere ha o hlohlorile mehlwaare ya hao, o se ke wa romela ho kgwahlapisa kamora hao; se setseng e be sa moditjhaba, le sa kgutsana, le sa mosadi wa mohlolohadi. ₂₁Leha o kotula merara ya hao, o se ke wa kgwahlapisa se setseng kamora hao, e be sa moditjhaba, le sa kgutsana, le sa mosadi wa mohlolohadi. ₂₂O nne o hopole hobane o bile mofo naheng ya Egepeta; ke ka baka leo ke o laelang ho etsa ditaba tsena.