DEUTERONOMA 22

₁Etlere ha o bona kgomo ya ngwaneno, kapa nku ya hae, di lahlehile, o se ke wa di fapoha, o mpe o di busetse ho ngwaneno. ₂Ekare ha ngwaneno a sa aha haufi le wena, mohlomong o sa mo tsebe, o di tlise hae, di dule ho wena, ngwaneno a be a tle ho di batla, e be moo o di busetsang ho yena. ₃Etsa jwalo le ka esele ya hae; etsa jwalo le ka diaparo tsa hae, le ka dintho tsohle tsa ngwaneno, tse lahlehileng. Ha o di bona di lahlehile, o se ke wa di fapoha. ₄Etlere ha o bona esele ya ngwaneno, kapa kgomo ya hae, di wetse tseleng, o se ke wa di fapoha; o mpe o mo thuse ho di tsosa.

₅Mosadi a se ke a apara diaparo tsa monna, mme monna a se ke a apara diaparo tsa mosadi; hobane bohle ba etsang jwalo, ba manyala ho Jehova, Modimo wa hao.

₆Etlere ha o tshoha o bona tseleng hodima sefate, kapa fatshe, sehlaha sa dinonyana se nang le madinyane, kapa mahe, mma wona a alamile madinyane, kapa mahe, o se ke wa nka nonyana le madinyane a yona; ₇o nke madinyane, mme o tlohele mma wona, o tle o be le lehlohonolo, mme o ngatafatse matsatsi a hao.

₈Etlere ha o haha ntlo e ntjha, o tle o etse lehora le potang marulelo a hao, esere mohlomong ntlo ya hlahelwa ke molato wa madi a motho ya leng hodima yona, a wela fatshe.

₉O se ke wa jala peo tsa mefuta tshimong ya hao ya morara, esere ho beha ha tseo o di jadileng, le ho beha ha morara, tsa o senyehela.

₁₀O se ke wa lema ka kgomo le esele di bofilwe hammoho.

₁₁O se ke wa apara seaparo se lohilweng ka dintho tse sa tshwaneng, jwaloka boya ba dinku le lene hammoho.

₁₂Etsa ditjellane masotong a mane a kobo eo o ikapesang ka yona.

₁₃Etlare ha monna e mong a nyala mosadi, mme a ya ho yena, a ntoo mo hloya, ₁₄mme a mo tlama ka ditaba tse mpehadi, tse senyang lebitso la hae, a mo hobosa, a re: Ke nkile mosadi eo, mme ha ke tlile ho yena, ha ke a ka ka fumana dipontsho tsa borwetsana ho yena; ₁₅moo ntata morwetsana le mmae ba tla nka dipontsho tsa borwetsana ba mosadi eo, ba di hlahise pela baholo ba motse, kgorong. ₁₆Ntata morwetsana o tla bolella baholo, a re: Ke neile monna enwa moradi wa ka hore e be mosadi wa hae, mme jwale o mo hloile; ₁₇bonang, o mmeile taba tse mpehadi, a re: Ha ke a ka ka fumana dipontsho tsa borwetsana ho moradi wa hao. Athe bonang, dipontsho tsa borwetsana tsa moradi wa ka ke tsena. Jwale ba tla phutholla kobo pela baholo ba motse. ₁₈Baholo ba motse oo ba tla tshwara monna eo, ba mo otle. ₁₉Mme kahobane o hobositse morwetsana wa Iseraele ka ho senya lebitso le hae, ba tla mo lefisa ka dishekele tse lekgolo tsa silefera, tse tla newa ntata morwetsana; mme e tla nne e be mosadi wa hae; a ke ke a mo hlala, ha a ntse a phela. ₂₀Empa etlare ha taba e boletsweng ke yena e le ya nnete, e reng, dipontsho tsa borwetsana ha di a ka tsa fumanwa ho morwetsana eo; ₂₁ba tla ntsha morwetsana, ba mo tlise pela monyako wa ntlo ya ntatae, mme batho ba motse oo ba tla mo tlapunya ka majwe, a shwe, kahobane o entse manyala Iseraeleng, ka ho ineela bohlola tlung ya ntatae. Tlosa bobe haeno jwalo.

₂₂Ha ho ka fumanwa monna ya robalang le mosadi ya nyetsweng ke e mong, ba shwe ba babedi, monna le mosadi ba robetseng hammoho. Tlosa bobe jwalo Iseraeleng.

₂₃Etlare ha morwetsana a lebeleditswe ke monna, mme monna e mong a mo fumana motseng, a robala le yena, ₂₄moo le tla ba ntsha ba babedi, le ba ise kgorong ya motse, mme le ba tlapunye ka majwe, ba shwe: morwetsana, kahobane ha a ka a memetsa a le motseng, monna, kahobane a sentse mosadi wa ngwanabo. Tlosa bobe haeno jwalo. ₂₅Etlare ha monna a fumana naheng morwetsana ya lebeleditsweng, mme monna eo a mmeta, a robala le yena, moo monna ya robetseng le morwetsana eo o tla shwa yena a nnotshi. ₂₆Haele morwetsana, o ke ke wa mo etsa letho; morwetsana ha a ka a etsa sebe se tshwanelang lefu; hobane taba eo e dutse jwaloka ya motho ha a tsohela e mong matla, mme a mmolaya; ₂₇hobane morwetsana ya lebeleditsweng o fumanwe ke eo naheng, mme o memeditse, mme ho ne ho se e mong ya ka mo namolelang.

₂₈Etlare ha monna a fumana morwetsana ya sa lebeletswang, mme a mmeta, a robala le yena, mme ba bonwa; ₂₉monna ya robetseng le yena o tla nea ntata morwetsana dishekele tse mashome a mahlano tsa silefera, mme morwetsana e tla ba mosadi wa hae, kahobane o mo tlotlolotse; mme a ke ke a mo lahla, ha a ntse a phela.

₃₀Monna a se ke a nka mosadi wa ntatae, mme a se ke a apola kobo ya ntatae.