DEUTERONOMA 18

₁Baprista ba Balevi, leloko lohle la Levi, ba ke ke ba eba le kabelo, leha e le lefa, jwaloka Baiseraele ba bang; ba tla ja mahlabelo a Jehova a ditjheso, le lefa la hae. ₂Ba ke ke ba eba le lefa hara banababo bona; Jehova ke lefa la bona, jwalokaha a ba boleletse. ₃Tseo baprista ba tla ba le tokelo ya ho di nka ho ba hlahisetsang Modimo sehlabelo, ke tsena: leha e ka ba kgomo, kapa nku, ho newe moprista letsoho, le dihlaya, le mohodu. ₄O mo nee le dilopotsiya tsa koro ya hao, le tsa veine e ntjha ya hao, le tsa ole ya hao, le dilopotsiya tsa boya ba dinku tsa hao. ₅Hobane Jehova, Modimo wa hao o mo kgethile hara meloko ya hao yohle, hore a eme pela hae ho sebetsa ka lebitso la Jehova, e le yena le bara ba hae kamehla.

₆Ekare ha Molevi a etswa motseng o mong wa metse ya hao, nqalong tsohle tse Iseraeleng tseo a ahileng ho tsona, mme a etla ka takatso yohle ya moya wa hae nqalong eo Jehova a tla e kgetha; ₇o tla etsa tshebeletso ya teng ka lebitso la Jehova, Modimo wa hae, jwaloka banababo bohle ba Balevi ba emang teng pela Jehova, ₈a je kabelo e tshwanang le tsa ba bang, ho sa balwe seo a ka bang le sona ka thekiso ya ntho tsa baholo ba hae.

₉Etlare hobane o kene lefatsheng leo Jehova, Modimo wa hao, a o neang lona, o ke ke wa ithuta ho etsa ka manyala a ditjhaba tsa teng. ₁₀Ho se ke ha fumanwa haeno motho ya fetisang mora wa hae, leha e le moradi wa hae mollong, leha e le mophofi ya phofang, kapa selaodi se laolang, kapa senohe, kapa moloi, ₁₁le moupelli, leha e le ya botsang badimo, le ngaka e reng e a porofeta, leha e le ya botsang bafu; ₁₂hobane bohle ba etsang ditaba tseo, ba manyala ho Jehova, mme ke ka baka la manyala ao Jehova, Modimo wa hao, a falatsang ditjhaba tseno pela hao. ₁₃O be wa Jehova, Modimo wa hao, ka botho ba hao bohle. ₁₄Hobane ditjhaba tseno o tla rua lefatshe la tsona, di mamela dilaodi le dinohe; empa haele wena, Jehova, Modimo wa hao, ha a ka a o dumella ho etsa tse jwalo.

₁₅Jehova, Modimo wa hao, o tla o hlahisetsa moporofeta ya tswang haeno, hara banabeno ya jwaloka nna; le tla utlwa yena; ₁₆jwaloka ha o kile wa kopa ho Jehova, Modimo wa hao, Horebe, tsatsing la phutheho, wa re: Ke se ke ka boela ka utlwa lentswe la Jehova, Modimo wa ka; mme ke se hlole ke bona mollo oo o moholo, ke tle ke se ke ka shwa: ₁₇mme Jehova a re ho nna: Seo ba se boletseng ba se buile hantle; ₁₈ke tla ba hlahisetsa moporofeta ya tswang hara banababo bona, ya jwaloka wena; ke tla bea mantswe a ka molomong wa hae, mme o tla ba bolella tsohle tseo ke tla mo laela tsona. ₁₉Etlare ha e mong a ka hana ho utlwa mantswe a ka ao a tla a bolela ka lebitso la ka, ke nna ke tla mmotsa hoo. ₂₀Empa haele moporofeta ya ipeang ka boikgohomoso hore a bolele ka lebitso la ka taba eo ke sa kang ka mo laela yona hore a e bolele, leha mohlomong a bua ka lebitso la medimo esele, moporofeta eo a shwe. ₂₁Ekare ha o re pelong ya hao: Na re tla kgetha jwang lentswe le sa kang la bolelwa ke Jehova? ₂₂ke re: Etlare moporofeta eo, ha a bolela taba ka lebitso la Jehova, mme taba e boletsweng ke yena e sa hlahe, e sa etsahale etlaba ke taba eo Jehova a sa kang a e bolela; moporofeta eo o e boletse ka boikgohomoso; se mo tshabe.