Bohedene kamoo bo tla otlwa kateng, ha bo etswa ke Baiseraele.
1Ekare ha ho hlaha ha eno moporofeta, kapa molori wa ditoro, ya o tsebisang pontsho, kapa mohlolo, 2ha pontsho eo, kapa mohlolo oo a o boleletseng wona, o etsahala, mme a re ho wena: A re lateleng medimo esele, eo o sa e tsebeng, mme re e sebeletse; 3o se ke wa mamela dipolelo tsa moporofeta eo, kapa tsa molori eo wa ditoro; hobane ke Jehova, Modimo wa lona, ya le lekang hore a tsebe ha le rata Jehova, Modimo wa lona, ka pelo tsa lona tsohle, le ka meya ya lona yohle. 4Latelang Jehova, Modimo wa lona, le tshabe yena, le boloke ditaelo tsa hae, mme le utlwe lentswe la hae; le mo sebeletse, mme le mo kgomarele. 5Empa moporofeta eo, kapa molori eo wa ditoro, o tla bolawa, kahobane a boletse tsa ho fetohela Jehova, Modimo wa lona, ya le ntshitseng naheng ya Egepeta, ya o lopolotseng tlung ya bohlanka; o ratile ho o faposa tsela eo Jehova, Modimo wa hao, a o laetseng ho tsamaya ka yona. O tlose bobe ha eno jwalo.
6Ekare ha ngwaneno, mora wa mmao, kapa mora wa hao, kapa moradi wa hao, kapa mosadi wa sefuba sa hao, leha e ka ba motswalle wa hao ya leng jwaloka moya wa hao, a o susumetsa, a re ho wena ka sephiring: a re yeng, re sebeletse medimo esele, eo o sa kang wa e tseba, wena le bontatao, 7e leng medimo ya ditjhaba tse kamathoko ho lona, leha e le tse leng haufi, leha e le tse leng hole, ho qala pheletsong e nngwe ya lefatshe ho isa pheletsong e nngwe; 8o se ke wa mo dumella, mme o se ke wa mo utlwa, leihlo la hao le se ke la mo qenehela; o se ke wa mo utlwela bohloko, mme o se ke wa mo pata; 9o mpe o mmolaye ruri; letsoho la hao e be lona le emang pele hodima hae ho mmolaya, e ntoo ba matsoho a setjhaba kaofela. 10O mo tlapunye ka majwe, a shwe; kahobane a ratile ho o tlosa ho Jehova, Modimo wa hao, ya o ntshitseng naheng ya Egepeta, tlung ya bohlanka. 11Baiseraele bohle ba tla utlwa, ba tshabe, mme ho ke ke ha hlola ho etswa bobe bo bokalo ha eno.
12Ekare ha motseng o mong wa metse ya hao eo Jehova, Modimo wa hao, a tla o fa yona ho aha teng, o utlwa ho thwe: 13Batho ba bolotsana ba tswile ho wena, mme ba kgelositse ba ahileng motseng wa bona, ka ho re: A re yeng, re sebeletse medimo esele eo le sa e tsebeng; 14o tla batla o batlisise, o botsisise haholo. Ha o fumana hobane ke nnete le taba e tiileng, le hobane ho entswe manyala a kalo haeno, 15teng o bolaye ruri ba ahileng motseng oo ka bohale ba lerumo, mme o o neele anathema, le dintho tsohle tse ho wona; esita le dikgomo tsa teng di bolawe ka bohale ba lerumo. 16O tla bokella thepa yohle ya wona kahara lepatlelo, mme o tla tjhesetsa Jehova, Modimo wa hao, motse oo, le mesebetsi ya wona yohle, e tla nne e be qubu ya dithako kamehla, tse ke keng tsa boela tsa hahuwa. 17Ho ke ke ha eba letho la tse neetsweng anathema le kgomarelang matsoho a hao, hore Jehova a kgutle pefong ya bohale ba hae, mme a o hauhele, a o rekolohele, mme a o atise jwalokaha a anetse bontatao, 18ha o utlwa lentswe la Jehova, Modimo wa hao, o boloka ditaelo tsa hae tsohle, tseo ke o laelang tsona kajeno, mme o etsa se lokileng pela Jehova, Modimo wa hao.
