BAKOLOSE 4

₁Benghadi, etsetsang bahlanka ba lona ka ho loka le ka tshwanelo, le ntse le tseba hobane le lona le na le morena mahodimong.

₂Tiisetsang thapelong, mme le e fadimehele ka teboho. ₃Le hona, bohle hammoho, le re rapelleng, hore Modimo o re bulele monyako wa lentswe, re tle re bolele sephiri sa Kreste, seo ke leng motlamuwa ka baka le sona; ₄ke tle ke se pepese ka mokgwa oo ke tshwanetseng ho se bolela ka wona. ₅Tsamayang ka bohlale pela ba kantle, le ntse le lopolla dinako. ₆Le polelo tsa lona e be tse molemo kamehla, tse nokilweng ka letswai, le tle le tsebe kamoo le tshwanetseng ho araba e mong le e mong kateng.

₇Tikike, ngwaneso ya ratehang, mohlanka ya tshepehang, mong ka nna tshebeletsong ya Morena, o tla le tsebisa kahohle kamoo taba tsa ka di dutseng kateng. ₈Ke mo rometse ho lona ka hona hoo, hore a tle a tsebe kamoo taba tsa lona di dutseng kateng, mme a tshedise dipelo tsa lona. ₉O na le Onesima, ngwaneso ya tshepehang, ya ratehang, e leng e mong wa lona; ba tla le phetela tsohle tsa kwano.

₁₀Aristarke, ya tlamilweng le nna, o a le dumedisa; le motswala wa Barnabase, Mareka, eo le etseditsweng taelo ka baka la hae; ekare ha a etla ho lona, mo amoheleng. ₁₁Jesu, ya bitswang Juste, le yena o a le dumedisa. Ho ba lebollo, ke bona ba nnotshi ba ntshebedisang mmusong wa Modimo, mme ba bile tshediso ho nna.

₁₂Epafrase wa ha heno, mohlanka wa Kreste, o a le dumedisa; o ntse a le lwanela kamehla merapelong ya hae, hore le ke le eme le phethehile, mme le kgodise ka ho etsa ho rata hohle ha Modimo. ₁₃Le nna ke paka hoba o fela a le tjhesehela haholo, le ba Laodisea, le ba Hierapolise. ₁₄Luka, ngaka e ratwang, le Demase, ba le dumedisa. ₁₅Dumedisang baena ba Laodisea, le Nimfase, le kereke e ka tlung ya hae.

₁₆Etlere ha lengolo lena le badilwe ha heno, le bone hore le balwe le kerekeng ya Laodisea; mme le lona le bale le tswang Laodisea. ₁₇E reng ho Arkipe: Tadima tshebetso eo o e abetsweng ke Morena, o tle o e phethe.

₁₈Nna, Pauluse, ke le dumedisa mona ka letsoho la ka. Hopolang ditlamo tsa ka.

Mohau o be le lona. Amen!