Palo ya setjhaba le lefu la sewa.
1Jehova a boela a halefela Baiseraele, mme a ba a susumelletsa Davida, a re: Eya, o bale Iseraele le Juda.
2Morena a laela Joabe, molaodi wa makgotla, eo a nang le yena, a re: Eya le meloko yohle ya Iseraele, ho qala ka Dane, le ho ya fihla Beerseba, o bale setjhaba, ke tle ke tsebe bongata ba setjhaba. 3Joabe a re ho morena: Jehova, Modimo wa hao, a ke a atise setjhaba, se ke se fete boholo ba sona ba jwale halekgolo, mahlo a morena, monga ka, a be a bone; empa morena, monga ka, o lakaletsang ntho eo? 4Leha ho le jwalo, taelo ya morena ya hlola Joabe le balaodi ba bang ba makgotla, mme Joabe le balaodi ba bang ba makgotla ba tloha ho morena ho ya bala setjhaba sa Iseraele.
5Ba ya, ba tshela Jordane, ba emisa Aroere, ho le letona ho motse o hara kgohlo ya Gade, nqa Jaesere. 6Ba ntoo tla Gileade, le naheng ya Thahethime-Hodshi, ba ntoo fihla Dane-Jaane, le mathokong a Sidone. 7Ba ntoo fihla qhobosheaneng ya Tire, le metseng yohle ya Baheve le ya Bakanana. Ha ba tloha teng, ba leba nqa borwa ho Juda, ho ya fihla Beerseba. 8Eitse hobane ba potapote jwalo le naha yohle, ba kgutlela Jerusalema, ho se ho fetile kgwedi tse robileng mono o le mong tse nang le matsatsi a mashome a mabedi. 9Yaba Joabe o nea morena palo ya bongata ba setjhaba; ho ne ho le Iseraeleng kete tse makgolo a robileng meno e le mmedi tsa banna ba ntwa ba tsomolang sabole, banna ba Juda bona e le ba dikete tse makgolo a mahlano.
10Eitse hobane Davida a bale setjhaba, letswalo la hae la mo loma, mme Davida a re ho Jehova: Ke sitilwe haholo ka seo ke se entseng. Oho Jehova, tlosa bokgopo ba mohlanka wa hao jwale; efela ke entse ka bothoto bo boholo.
11Davida, ha a tsoha hosasa, lentswe la Jehova la tlela moporofeta Gade, seboni sa Davida, 12la re: Eya, o re ho Davida: Ho thwe ke Jehova: Ke o behela taba tse tharo; ikgethele e nngwe ho tsona, ke o etse yona. 13Gade ha a fihla ho Davida, a mo tsebisa, a re ho yena: Hleka o re, o tlelwe ke tlala ka dilemo tse supileng naheng ya hao; kapa o re, o tla baleha ka kgwedi tse tharo pela dira tsa hao, di ntse di o lelekisa; kapa o re, ho tle lefu la sewa naheng ya hao ka tshiu tse tharo na? Ikgethele jwale, o bone hore na ke tla busetsa taba efe ho ya nthomileng. 14Davida a re ho Gade: Ke tsielehile haholo; a re mpe re wele matsohong a Jehova, etswe mehauhelo ya hae e le mengata; ke se ke ka wela matsohong a batho.
15Ha ho le jwalo, Jehova a nehela Iseraele lefu la sewa, ho qala ka nako ya hosasa, ho fihla nakong e beilweng, le ho tloha Dane, ho isa Beerseba. Ha eshwa batho ba mashome a supileng a dikete hara setjhaba. 16Lengeloi, eitse ha le lebisa letsoho la lona nqa Jerusalema hore le bolaye ba teng, Jehova a ba utlwela bohloko ka baka la tshenyeho, a re ho lengeloi le bolayang setjhaba: Ho lekane; honyetsa letsoho la hao jwale! Ke ha lengeloi la Jehova le ne le eme pela seotlo sa Arauna Mojebuse. 17Davida, ha a bona lengeloi le bolayang setjhaba, a bolella Jehova, a re: Bona, ke nna ke entseng hampe; nku tseo tsona di entseng? Tsoho la hao le otle nna le ntlo ya ntate!
18Tsatsing lona leo, Gade a tla ho Davida, a re ho yena: Eya, o hahele Jehova aletare seotlong sa Arauna Mojebuse. 19Ka polelo ya Gade, Davida a ya, kamoo Jehova a laetseng kateng. 20Eitse Arauna ha a tadima, a bona morena le bahlanka ba hae ba etla ho yena. Yaba Arauna o tloha, a ya, a inamela fatshe ka sefahleho pela morena. 21Arauna a re: Morena, monga ka, o tletseng ho mohlanka wa hae? Davida a re: Ke tlile ho reka seotlo ho wena, ke tle ke hahele Jehova aletare teng, hore lefu le tlohe setjhabeng. 22Arauna a re ho Davida: Morena, monga ka, a nke feela, mme a hlahisetse Jehova kahohle kamoo a ratang kateng. Bona, pholo ke tsena tsa setjheso; hape, mesebetsi ya ho pola le mesebetsi e meng ya dipholo e ka etsa patsi. 23Morena, Arauna o nea morena tseo tsohle. Arauna a eketsa a re ho morena: Jehova, Modimo wa hao, a ke a o hauhele! 24Morena a re ho Arauna: Tjhe, ke tla mpe ke reke ho wena ka theko; nke ke ka hlahisetsa Jehova, Modimo wa ka, ditjheso tseo ke sa di ntshetsang letho. Ha ho le jwalo, Davida a reka seotlo le dipholo ka dishekele tsa silefera tse mashome a mahlano. 25Teng, Davida a hahela Jehova aletare, a mo etsetsa ditjheso le mahlabelo a teboho. Yaba Jehova o hauhela naha, mme lefu la tloha Iseraeleng.
