II SAMUELE 23

₁Mantswe a mang a Davida a ho qetella ke wona ana: Ho bolela Davida, mora Jese; ho bolela monna ya phahamiseditsweng hodimo, motlotsuwa wa Modimo wa Jakobo, moroki ya kgahlehang wa Iseraele.

₂Moya wa Jehova o bua ka nna, lentswe la hae le lelemeng la ka. ₃Modimo wa Iseraele o buile, Lefika la Iseraele le mpoleletse, la re: Ya busang batho ka ho loka, ya renang ka ho tshaba Modimo, ₄o jwaloka lesedi la meso, ha tsatsi le tjhaba, ha meso e se na maru; pula ha e tswa na, mahlasedi a lona a medisa jwang lefatsheng. ₅Ha ke re, ntlo ya ka e jwalo pela Modimo, hobane o hlabile le nna selekane se sa feleng, se lokileng kahohle, se tiileng! Ha ke re, o tla medisa polokeho ya ka yohle le tsohle tse lakatswang ke nna! ₆Haele ba bolotsana, kaofela ha bona ba ka meutlwa e lahlwang, e se nang ho tshwarwa ka letsoho; ₇eo monna ya e amang, e ka kgonang a tshware selepe kapa theko ya lerumo; mme e tjhesetswa ka mollo hona moo e leng teng.

₈Ke ana mabitso a dinatla tsa Davida: Joshebe-Bashebethe, wa Thakhemone, hlooho ya balaodi. A betsa ka lerumo la hae, mme ka tsatsi le le leng, a hlaba batho ba makgolo a robileng meno e le mmedi.

₉Ya mo hlahlamang ke Eleasare, mora Dodai, wa Akoke; ke e mong wa dinatla tse tharo tsa pele, tse nnileng tsa ya le Davida, li sa tshabe Bafilesta mohla ba phuthehileng ka ntwa, banna ba Iseraele ha ba balehetse maralleng. ₁₀Yena a ema, a bolaya Bafilesta, ha ba ha kgathala letsoho la hae, la kgomarela sabole. Ke ka yena Jehova a namoletseng Baiseraele haholo mohlang oo, setjhaba sa ba sa kgutla le yena e le hore se hape feela.

₁₁Ya mo hlahlamang, ke Shamma, mora Age, wa Harare. Bafilesta ba ne ba phuthehile Lehi, moo tshimo e leng teng e tletseng dinawa; setjhapa sa baleha pela Bafilesta. ₁₂Eo a mpa a ema bakeng seo, a lwanela setjhaba, a bolaya Bafilesta. Jehova a namolela Baiseraele haholo le ka yena.

₁₃Ba bararo ba dinatla tse mashome a mararo, ba theoha, ba fihla ho Davida, lehaheng la Adullame, mohla ho kotulwang; ntwa ya Bafilesta e ne e emisitse sekgutlong sa Barefaime. ₁₄Davida yena o ne a le seqhobong, mme sehlopha sa Bafilesta se ne se le Bethlehema. ₁₅Davida a lakatsa, a re: Ke mang ya tla nnosa metsi a sediba sa Bethlehema, se kgorong? ₁₆Bahale bao ba bararo ba ya, ba phunyaka makgotla a Bafilesta, ba ya kga metsi sedibeng sa Bethlehema se kgorong; ba a kga, ba tla le wona ho Davida; a mpa a hana ho a nwa, a a tshollela Jehova, ₁₇a re: Oho Jehova, a nke ke se ke ka etsa hoo; ha ke re, ke madi a banna bao ba ileng, ba tedile ho phela ha bona? Kahoo, a hana ho a nwa. Hoo ha etswa ke bahale bao ba bararo.

₁₈E mong ke Abishai, ngwanabo Joabe, mora Tseruja; ke e mong e moholo ho ba bararo ba bang; a betsa ka lerumo la hae, a hlaba ba makgolo a mararo, a iketsetsa lebitso hara ba bararo. ₁₉Ho ba bararo, ya eba yena ya roriswang; ya eba monga bona ke hona, a mpa a sa fihle ho ba bararo ba pele.

₂₀E mong ke Benaia, mora Jehojada, mora mohale e mong wa Kabtseele; a ba moholo ka diketso tsa hae. A bolaya tau tse pedi tse matla tsa Moabe; a boela a theoha, a bolaya tau e nngwe lemeneng, mohla lehlwa le kgethehang. ₂₁A bolaya le monna wa Moegepeta, ya sebopeho se tshabehang; leha Moegepeta a ne a tshwere lerumo letsohong la hae, yena Benaia a theohela ho yena ka molamu, a rutla lerumo letsohong la Moegepeta, a ba a mmolaya ka lona lerumo leo la hae. ₂₂Tseo tsa etswa ke Benaia, mora Jehojada; a iketsetsa lebitso hara bahale bao ba bararo. ₂₃Ho ba mashome a mararo, ya eba yena ya roriswang, a mpa a se ke a fihla ho ba bararo ba pele. Davida a mmea monna wa lekgotla la hae.

₂₄Asaele, ngwanabo Joabe, e ne e le e mong wa ba mashome a mararo; le Elkanane, mora Dodo wa Bethlehema; ₂₅le Shamma, wa Harode, le Elika wa Harode; ₂₆le Heletse Mopelethe, le Ira, mora Ikkeshe, wa Tekowa; ₂₇le Abiesere wa Anathothe, le Mebunnai wa Husha; ₂₈le Tsalmone wa Akowa, le Maharai wa Nethofa; ₂₉le Helebe, mora Baana, wa Nethofa, le Ittai, mora Ribai, wa Gibea wa bana ba Benjamine; ₃₀le Benaia wa Pirathone, le Hiddai wa Nahale-Gaashe; ₃₁le Abi-Albone wa Araba, le Asmavethe wa Barkume; ₃₂le Eliaba wa Shaalbone, le Bene-Jashene, le Jonathane; ₃₃Shamma wa Harare, le Akiame, mora Sharare, wa Harare; ₃₄le Elifelethe, mora Akasbai, mora Momaakathe; le Eliame, mora Akitofele, wa Gilo; ₃₅le Hetsrai wa Karmele, le Paarai Moarabe; ₃₆le Jigeale, mora Nathane, wa Tsoba, le Banie wa Gade; ₃₇le Tseleke Moammone, le Naharai wa Beerothe, lehlahana la Joabe mora Tseruja. ₃₈Hape, ke Ira wa Jethere, le Garebe wa Jethere, ₃₉le Uria Mohethe. Kaofela ha bona ba mashome a mararo a metso e supileng.