Jorame, morena wa Iseraele. — Ho futuhelwa Bamoabe.
1Jorame, mora Akabe, a qala ho busa Iseraele a le Samaria, ka selemo sa leshome le metso e robileng meno e mmedi sa Josafate, morena wa Juda; a busa ka lemo tse leshome le metso e mmedi.
2A etsa ho leng hobe mahlong a Jehova, empa e seng jwaloka ntatae, leha e le jwaloka mmae; hobane a heletsa ditshwantsho tsa Baale, tse entsweng ke ntatae. 3Leha ho le jwalo, a phehella dibe tseo Jeroboame, mora Nebathe, a sebisitseng Iseraele ka tsona, a se ke a di kgeloha.
4Mesha, morena wa Moabe, o ne a ruile mehlape ya dinku; o ne a ntse a ntshetsa morena wa Iseraele lekgetho la dikonyana tse dikete tse lekgolo, le la dipheleu tse dikete tse lekgolo, ka boya ba tsona. 5Yare hoba Akabe a timele, morena wa Moabe a fetohela morena wa Iseraele. 6Mohlang oo, morena Jorame a tswa Samaria, a bala Baiseraele bohle. 7Ha a tloha, a romela ho Josafate, morena wa Juda, ka ho re: Morena wa Moabe o mphetohetse; hleka o tla ya le nna ho lwantsha Moabe na? Yena a re: Ke tla ya; ke ka wena le setjhaba sa ka se ka setjhaba sa hao, le dipere tsa ka di ka pere tsa hao. 8A ba a re: Re tla ya ka tsela efe? Yena a re: Ka tsela e yang le lefeella la Edomo.
9Yaba morena wa Iseraele, le morena wa Juda, le morena wa Edomo a tloha, a potoloha ka ditshiu tse supileng; ha hlokahala metsi a makgotla le a dipelesa tse a latelang. 10Morena wa Iseraele a re: Jo! Jehova o bitsitse marena ana a mararo, ho a neela matsohong a Bamoabe! 11Josafate a re: Hleka ha ho moporofeta wa Jehova mona, eo re ka botsang Jehova ka yena na? E mong wa bahlanka ba morena wa Iseraele a fetola, a re: Elisha, mora Shafathe, o teng, ya neng a tshella Elia metsi matsohong. 12Josafate a re: Lentswe la Jehova le ho yena. Ebile morena wa Iseraele, le Josafate, le morena wa Edomo, ba theohela ho yena.
13Elisha a re ho morena wa Iseraele: Ke na le taba efe le wena? Ikele ho baporofeta ba ntatao le ho baporofeta ba mmao! Empa morena wa Iseraele a re ho yena: Tjhe, hobane Jehova o bitsitse marena ana a mararo, ho a neela matsohong a Bamoabe. 14Elisha a re: Ka Jehova wa makgotla ya utlwang, eo ke emeng pela hae, hoja ha ke ele Josafate, morena wa Juda, hloko, nka be ke sa o shebe le ho o tadima. 15Jwale, ntlisetseng moletsi wa harepa. Yare ha moletsi wa harepa a letsa harepa, letsoho la Jehova la eba hodima Elisha. 16A re: Ho thwe ke Jehova: Tjhekang dikotikoti sekgutlong sena; 17hobane ho thwe ke Jehova: Le ke ke la bona moya, le ke ke la bona le pula; leha ho le jwalo, sekgutlo sena se tla tlala metsi, le tle le nwe, lona le dikgomo tsa lona le dipelesa tsa lona. 18E nyenyane taba ena mahlong a Jehova: hape, o tla be a neele le Bamoabe matsohong a lona. 19Le tla fedisa metse yohle e dikilweng ka marako, le metse yohle e metle; le tla rema difate tsohle tse monate, le kate didiba tsohle tsa metsi, le senye masimo wohle a matle ka majwe. 20Yare hosasane, ka nako ya ho hlahisa sehlabelo, ba bona metsi a etla ka tsela ya Edomo, lefatshe la ba la tlala metsi.
21Haele Bamoabe bohle, ha ba utlwa hobane marena ao a tlile ho ba lwantsha, ha bokangwa bohle ba ka hlomelang, ho isa le ho ba hodileng, mme ba ema moeding.
22Yare hosasane, ha ba tsoha e sa le hosasa, letsatsi la tjhabela metsi; Bamoabe ba bona metsi maloka le bona, a le mafubedu jwaloka madi. 23Ba re: Ke madi; efela marena ao a bolayane, a timetsane. Helang! Bamoabe, a re yeng ho hapa. 24Empa ha ba fihla diahelong tsa Iseraele, Baiseraele ba tsoha, ba qhala Bamoabe, bao ba ba ba baleha pela bona; yabe esale ba eya ba ntse ba bolaya Bamoabe, ho ya kena naheng ya bona. 25Ba qhaqha metse; e mong le e mong a akgela lejwe la hae masimong wohle a matle; ba kata didiba tsohle tsa metsi, ba rema difate tsohle tse monate; ba betsang ka letjeketjane ba teela Kire-Haresethe hare, ba o senya, ba siya majwe feela. 26Morena wa Moabe, ha a bona a hlotswe ke ntwa, a inkela banna ba makgolo a supileng, ba tshwereng disabole, a tle a phunye ho fihla moreneng wa Edomo, ba mpa ba sitwa. 27Yaba o nka mora hae wa letsibolo, ya beng a tshwanetse ho mo hlahlama boreneng, a mo etsa sehlabelo sa setjheso hodima lerako. Yaba Baiseraele ba halefelwa haholo, ba ba ba tloha, ba boela naheng ya bona.
