II DIKRONIKE 13

₁Ka selemo sa leshome le metso e robileng meno e le mmedi sa morena Jeroboame, Abija a qala ho busa Juda. ₂A busa Jerusalema ka lemo tse tharo; lebitso la mmae e ne e le Mikaia, moradi wa Uriele wa Gibea.

₃Ntwa ya eba teng mahareng a Abija le Jeroboame. Abija yena a futuha a ena le sera sa bahlabani ba dikete tse makgolo a mane ba kgethilweng; Jeroboame le yena a ya hlopholla ntwa ya hae ya bahlabani ba bohale ba dikete tse makgolo a robileng meno e le mmedi ba kgethilweng.

₄Abija a ema qhoweng ya thaba ya Tsemaraime, e dithabeng tsa Efraime, a re: Nkutlweng, wena Jeroboame le lona Baiseraele bohle. ₅Na ha le a tshwanela ho tsebisisa hoba Jehova, Modimo wa Iseraele, o ne a nee Davida borena ba Iseraele ka ho sa feleng, a bo nea yena le bara ba hae, ka selekane se se nang ho tlolwa na? ₆Empa Jeroboame, mora Nebathe, mohlanka wa Salomone, mora Davida, o eme, mme o kwenehetse monga hae; ₇batho ba lefeela, bara ba Beliale, ba phuthehetse ho yena, mme ba hlotse Roboame, mora Salomone. Athe Roboame o ne a sa le monyenyane, a le pelo e boi, mme o hlokile matla pela bona. ₈Mme jwale, le re, le tla fenya mmuso wa Jehova o matleng a bara ba Davida. Efela le batho ba bangata, mme le bile le na le manamane a kgauta ao Jeroboame a le etseditseng medimo ka wona. ₉Ana ha le a ka la leleka baprista ba Jehova, e leng bara ba Aarone le Balevi, mme le iketseditse baprista ka mokgwa wa ditjhaba tsa mafatshe a mang na? Mang le mang ya itlisitseng, a ena le pohwana le dipheleu tse supileng, a tle a kgethelwe boprista, o entswe moprista wa seo e seng Modimo. ₁₀Haele rona, Jehova ke Modimo wa rona; ha re a mo furalla; baprista ba etsang tshebeletso ya Jehova ke bara ba Aarone, le bona Balevi ba mosebetsing wa bona; ₁₁ka hosasa ho hong le ho hong le ka mantsiboya a mang le a mang, re tjhesetsa Jehova ditjheso le dibano tse monko o monate. Hape, re lokisa mahobe a pontsha tafoleng e hlwekileng, re hotetsa le kandelare ya kgauta le dilampi tsa yona ka shwalane e nngwe le e nngwe. Hobane re fela re boloka seo Jehova, Modimo wa rona, a itseng re se boloke; empa lona, le mo furaletse. ₁₂Bonang hle, Modimo o na le rona, o re eteletse pele le baprista ba tshwereng diterompeta tse tlerolang tsa ho le letsetsa. Oho, bana ba Iseraele, le se ka la lwantsha Jehova, Modimo wa bontata lona, hobane le ke ke la atleha.

₁₃Empa Jeroboame a isa ba lallang maraong a Bajuda; haele yena a ema mabapa le Bajuda, mme ba laletseng ba eba kamora bona. ₁₄Eitse ha Bajuda ba reteleha, ba bona ntwa e ba tlela kapele le kamorao. Yaba ba howeletsa ho Jehova; baprista ba letsa diterompeta; ₁₅batho ba Juda ba etsa ditlatse; ha batho ba Juda ba etsa ditlatse, Jehova a qhala Jeroboame le Baiseraele bohle pela Abija le Juda; ₁₆bana ba Iseraele ba baleha pela Bajuda, mme Modimo wa ba neela matsohong a bona. ₁₇Abija le batho ba hae ba ba bolaya jwalo ka polao e kgolo, ha ba ha wa ho Baiseraele batho ba kgethilweng ba dikete tse makgolo a mahlano. ₁₈Bana ba Iseraele ba kokobetswa jwalo mohlang oo, mme bana ba Juda ba hlola, ka baka la hobane ba ne ba itshetlehile ka Jehova, Modimo wa bontata bona. ₁₉Abija a phallela Jeroboame, mme a mo amoha metse e meng, e le Bethele le metsana ya teng, le Jeshana le metsana ya teng, le Efrone le metsana ya teng. ₂₀Matsatsing a Abija, Jeroboame ha a ka a hlola a ipha matla, Jehova a ba a mo otla, a shwa. ₂₁Empa Abija a ipha matla, a nyala basadi ba leshome le metso e mene, mme a tswala bara ba mashome a mabedi a metso e mmedi le baradi ba leshome le metso e tsheletseng.

₂₂Haele ditaba tse ding tsa Abija, le tseo a di entseng, le mantswe a hae, di ngodilwe bukeng ya dihlaloso tsa moporofeta Iddo.