II DIKRONIKE 11

₁Roboame eitse hobane a fihle Jerusalema, a phutha ntlo ya Juda le Benjamine, ya eba banna ba dikete tse lekgolo le mashome a robileng meno e le mmedi, banna ba lokelang ho lwana, a tle a futuhele Iseraele, hore mmuso kaofela o busetswe ho Roboame. ₂Empa lentswe la Jehova la tlela Shemaia, monna wa Modimo, la re: ₃Bolella Roboame, mora Salomone, morena wa Juda, le Baiseraele bohle ba naheng ya Juda le Benjamine, o re: ₄Jehova o re: Se nyoloheng, se futuheleng banababo lona. Ikgutlelleng e mong le e mong tlung ya hae, hobane taba eo ke ka nna e etsahetseng. Ba mamela lentswe le Jehova, ba kgutlela hae, ba tlohela ho futuhela Jeroboame.

₅Roboame a nna a dula Jerusalema; a haha metse ya diqhobosheane Juda. ₆A haha Bethlehema, Ethame, le Tekowa, ₇Bethe-Tsure, Soko, le Adullame, ₈Gathe, Maresha, le Sife, ₉Adoraime, Lakishe, le Aseka; ₁₀Tsorea, Ajalone, le Hebrone, metse ya Juda le Benjamine, a e esa metse ya diqhobosheane. ₁₁A e haha ka thata, a bea balaodi ho yona, le mediko ya dijo, ya ole le ya veine; ₁₂mme motseng o mong le o mong a bea dithebe le marumo; a etsa metse e thata haholoholo. Haele Juda le Benjamine, e ne e le ba hae.

₁₃Haele baprista le Balevi ba neng ba le kahohle Iseraeleng, ba tloha naheng tsa bona, ba phuthehela ho yena. ₁₄Balevi ba fela ba tlohela meraka ya bona le maruo a bona, ba tla Juda le Jerusalema kahobane Jeroboame le bara ba hae ba ne ba ba furaletse, ba tle ba se ke ba phetha mosebetsi wa baprista ba Jehova; ₁₅o ne a ikgethetse baprista ba dinqalo tse diphahameng ho hlabela diphooko le manamane ao a neng a a entse. ₁₆Ba latelwa ke ba meloko yohle ya Iseraele ba batlang Jehova, Modimo wa Iseraele, ka pelo yohle ya bona, ba bileng ba tla Jerusalema ho hlabela Jehova, Modimo wa bontata bona. ₁₇Ba tiisa mmuso wa Juda jwalo, mme ba natlafatsa Roboame, mora Salomone, ka lemo tse tharo; hobane ba fela ba tsamaya mehlaleng ya Davida le Salomone ka dilemo tse tharo.

₁₈Roboame a inkela mosadi: ke Mahalathe, moradi wa Jerimothe, mora Davida le Abihaile, moradi wa Eliabe, mora Jese. ₁₉A mo tswalla bara, Jeushe le Shemaria le Sahame. ₂₀A ntoo nka Maaka, moradi wa Absalome; eo a mo tswalla Abija, Attai, Sisa le Shelomithe. ₂₁Roboame a rata Maaka, moradi wa Absalome, ho ena le basadi ba hae ba bang kaofela le direthe tsa hae; athe o ne a nkile basadi ba leshome le metso e robileng meno e le mmedi le direthe tse mashome a tsheletseng, mme a tswala bara ba mashome a mabedi a metso e robileng meno e le mmedi le baradi ba mashome a tsheletseng. ₂₂Roboame a bea Abija, mora Maaka, ya kapele ho ba bang, hore e tle e be hlooho ya banababo; hobane o ne a rata ho mo etsa morena. ₂₃A nna a etsa ka kelello, a qhalanyetsa bara ba hae bohle dinaheng tsohle tsa Juda le Benjamine, metseng yohle ya diqhobosheane, a ba nea dijo tse ngata, mme a ba batlela basadi ba bangata.