I BATHESALONIKA 3

₁Ka baka la ho hlolwa ke hlolohelo eo, re ikgethetse ho siuwa Athene re nnotshi. ₂Mme re romile Timothea, ngwanabo rona, mohlanka wa Modimo, ya re sebedisang Evangeling ya Kreste, hore a ye ho le tiisa le ho le kgothatsa bakeng sa tumelo ya lona; ₃ho tle ho se ke ha eba ya sisinngwang ke dihloriso tseo; athe le fela le tseba hobane re abetswe tsona. ₄Hobane esitile re sa na le lona, re nnile ra le bolella pele hore e ka kgona re hloriswe, jwalokaha ho etsahetse le hona, le jwalokaha le tseba.

₅Ke re, ka baka la ho hlolwa ke ho le hlolohelwa, nkile ka roma Timothea, a tle a bone kamoo tumelo ya lona e dutseng kateng; esebe mohlomong moleki a le lekile, mme mosebetsi wa rona wa fetoha lefeela.

₆Empa Timothea, ha a etla ho rona a etswa ha heno, o re behetse ditaba tse monate tsa tumelo ya lona le tsa lerato la lona, a re, le ntse le re hopotse kamehla, le lakatsa haholo ho re bona jwalokaha le rona re lakatsa ho le bona. ₇Efela banabeso, re tshedisitswe ke lona, ka tumelo ya lona, mahlomoleng wohle a rona le tsietsing tsa rona. ₈Hobane jwale, ha le tiile Moreneng, re a phela. ₉Mme re ka ananela ho Modimo bakeng sa lona ka teboho efe, ka baka la thabo yohle eo re le thabetseng ka yona pela Modimo wa rona? ₁₀Re ntse re o rapela motshehare le bosiu ka ho fetisisa, hore re ke re tsebe ho bona difahleho tsa lona le ho ekeletsa tumelo ya lona ka seo e haellwang ke sona.

₁₁Oho! re etsetswe tsela ya ho tla ho lona ke Modimo, Ntata rona, le ke Morena wa rona Jesu Kreste! ₁₂Mme Morena a le hodise, mme a le atisetse lerato la ho ratana, le la ho rata bohle, jwalokaha re le rata le rona, ₁₃a tle a tiise dipelo tsa lona; di hloke sekodi kgalalelong, pela Modimo, Ntata rona, ho tleng ha Morena wa rona Jesu Kreste hammoho le bahalaledi ba hae bohle.