I SAMUELE 5

₁Haele Bafilesta, ba ne ba nkile areka ya Modimo; ba e tlosa Eben-Esere, ba e isa Ashdode. ₂Bafilesta ha ba se ba ile le areka ya Modimo, ba e kenya tlung ya Dagone, ba e bea mabapa le Dagone. ₃Empa ba Ashdode ha ba tsoha hosasa, ba bona Dagone a wetse fatshe ka sefahleho pela areka ya Jehova. Yaba ba nka Dagone, ba mmusetsa tulong tsa hae. ₄Ha ba boela ba tsoha e sa le ka meso ka la hosasane, ba bona Dagone a boetse a wetse fatshe ka sefahleho pela areka ya Jehova, hlooho ya Dagone le diatla tse pedi tsa hae di kgaohile, di le pela monyako, ho setse setopo sa hae feela. ₅Ke ka baka leo baprista ba Dagone, leha e le bohle ba kenang tlung ya Dagone, ba sa hateng sefate sa monyako wa Dagone, Ashdode, ho fihlela kajeno.

₆Empa letsoho la Jehova la eba boima hodima ba Ashdode; a senya, a otla ba Ashdode le ba mathoko a teng ka diso. ₇Banna ba Ashdode, ha ba bona hobane ho jwalo, ba re: Areka ya Modimo wa Iseraele e ke ke ya dula hara rona, etswe letsoho la hae le le boima hodima rona, le ho Dagone, modimo wa rona. ₈Yaba ba romela ho phutha marena wohle a Bafilesta, ba re: Re tla etsang ka areka ya Modimo wa Iseraele? A araba, a re: Areka ya Modimo wa Iseraele a e ke e iswe Gathe. Mme areka ya Modimo wa Iseraele ya iswa teng. ₉Yare e sa iswa, letsoho la Jehova la hlahisa tsietsi e kgolo motseng, a otla banna ba motse ba baholo le ba banyenyane, ba tswa diso. ₁₀Yaba ba romela areka ya Modimo Ekrone. Eitse ha areka ya Modimo e kena Ekrone, ba Ekrone ba bokolla, ba re: Ba re tliseditse areka ya Modimo wa Iseraele, ba tle ba re timeste le setjhaba sohle sa heso. ₁₁Ka baka lena, ba romela ho phutha marena wohle a Bafilesta, ba re: Kgutlisang areka ya Modimo wa Iseraele, e ke e boele ha habo yona, e tle e se ke ya re bolaya le setjhaba sa heso. Hobane letsoso le leholo le ne le wetse motse wohle, le letsoho la Jehova le ne le le boima haholo teng. ₁₂Haele banna ba sa kang ba eshwa, ba otlwa ka diso, seboko sa motse sa ba sa nyolohela lehodimong.