Davida o balehela Nobe ho moprista e moholo Akimeleke, — le Gathe ho morena Akishe, — le lehaheng la Adullame, — le Mitspe ho morena wa Moabe, — le morung wa Herethe. — Saule o bolaya Akimeleke le batho bohle ba Nobe.
1Davida a ya Nobe, ho moprista Akimeleke; Akimeleke a tshoha, ha a teana le Davida, a re ho yena: Ho ya kang ha o le nnotshi, o se na motho le a mong? 2Davida a re ho moprista Akimeleke: Morena o ntaetse taba, a re ho nna: Ho se ke ha tseba motho taba eo ke o romang yona, le seo ke o laetseng sona. Ke kahoo ke laetseng bahlankana ba ka baka se itseng. 3Keng eo o nang le yona matsohong a hao? Mphe dipolokwe tse hlano, leha e le ho hong ho ka fumanwang. 4Moprista a araba Davida, a re: Ha ke na bohobe feela; bo leng teng ke bohobe bo kgethehileng, ha ekaba bahlankana ba ipolokile basading. 5Davida a araba moprista, a re ho yena: Kannete re timilwe basadi, e se e le ditshiu tse tharo, haesale ke tloha; le mmele ya bahlankana e hlwekile; le bohobe boo ke boo e leng bohobe feela ka mokgwa o mong, hobane kajeno ho kgethwa bo bong pitseng. 6Yaba moprista o mo fa bohobe bo kgethehileng, etswe ho ne ho se bohobe teng, haese bohobe ba pontsha bo tlositsweng pela Jehova, hore ho bewe bohobe bo futhumetseng ha bo bong bo tloswa.
7Tsatsing leo, e mong wa bahlanka ba Saule o ne a le teng a thibetswe pela Jehova, bitso la hae e le Doege, Moedomo, e le moholo wa badisa ba Saule.
8Davida a re ho Akimeleke: Ana ha ho lerumo, leha e le sabole moo ho wena na? Hobane ha ke a ka ka nka sabole ya ka, leha e le dihlomo tsa ka, hobane taba ya morena e be e mphakisisa. 9Moprista a re: Sabole e teng ya Mofilesta Goliathe, eo o mmolaileng thoteng ya Ela; bona, ke eo, e phuthilwe ka lesela kamora efoda; ha o rata ho inkela yona, e nke, hobane haese yona, ha ho e nngwe mona. Davida a re: Ha ho e kang eo, nnee yona.
10Davida a ntoo tloha, a baleha mohlang oo ke ho tshaba Saule, a tla ho Akishe, morena wa Gathe. 11Bahlanka ba Akishe ba re ho yena: Na eo hase Davida, morena wa lefatshe na? Na hase yena eo ba neng ba dumelana, ba hobela, ba re: Saule o bolaile dikete tsa hae, Davida yena o bolaile kete tsa hae tse mashome na?
12Davida a nahana taba tseo pelong ya hae, a tshaba Akishe, morena wa Gathe, haholo. 13Ha ho le jwalo, a ikgakanya pontsheng ya bona, a iketsa lehlanya hara bona, a ngola mamating a monyako, a dutlisa dinqhenqhe, tsa dutlela tedung tsa hae. 14Ebile Akishe o re ho bahlanka ba hae: Bonang, monna enwa o a hlanya; le mo tliseditseng ho nna? 15Kapa le re, ke hloka mahlanya, ha le tlisitse eo hore a etse ketso tsa bohlanya pela ka na? Na ya jwalo a ka kena tlung ya ka na?
