I MARENA 16

₁Yaba lentswe la Jehova le tlela Jehu, mora Hanani, bakeng sa Baesha, la re: ₂Erekaha ke o phahamisitse, ka o ntsha leroleng, ka o bea modisa wa setjhaba sa ka sa Iseraele, mme o ile ka mehlala ya Jeroboame, wa sebisa setjhaba sa ka sa Iseraele, ke tle ke halefiswe ke dibe tsa bona. ₃Ke tla hlakola Baesha le lesika la hae, ke etse ka ntlo ya hao, jwalokaha ke entse ka ntlo ya Jeroboame, mora Nebathe. ₄Mora wa Baesha ya shwelang hae o tla jewa ke dintja; ya shwelang naheng o tla jewa ke manong a lehodimo.

₅Haele taba tse ding tsa Baesha, le tseo a di entseng, le matla a hae, ha ke re, di ngodilwe bukeng ya ditaba tsa ho phela ha marena a Iseraele?

₆Baesha a ntoo orohela ho bontatae, a patwa Thirtsa, mme mora hae, Ela, a busa tulong tsa hae.

₇Lentswe la Jehova la tla jwalo ka moporofeta Jehu, mora Hanani, hodima Baesha le ntlo ya hae, ka baka la bobe boo a bo entseng mahlong a Jehova, kamoo a kileng a mo halefisa kateng ka mesebetsi ya matsoho a hae, a le jwaloka ba ntlo ya Jeroboame, a mo halefisitse le ka ho e timetsa.

₈Ka selemo sa mashome a mabedi a metso e tsheletseng sa Asa, morena wa Juda, Ela, mora Baesha, a qala ho busa Iseraele a le Thirtsa, a busa ka dilemo tse pedi.

₉Yaba mohlanka wa hae Simri, molaodi wa makoloi a mang a hae, wa mo fetohela. Ela o ne a le Thirtsa, a ntse a enwa, a tahwa ka tlung ya Artsa, molebedi wa ntlo ya hae e Thirtsa. ₁₀Simri a kena, a mo hlaba, a mmolaya, e le ka selemo sa mashome a mabedi a metso e supileng sa Asa, morena wa Juda; yaba o busa tulong tsa hae. ₁₁Ha e se e le morena, a dutse teroneng ya hae, a bolaya bohle ba ntlo ya Baesha, a se ke a siya le a mong wa ba batona, leha e le bahabo, leha e le metswalle ya hae. ₁₂Ke ka mokgwa o jwalo Simri a timeditseng ntlo yohle ya Baesha, jwalokaha Jehova a ne a boleletse Baesha ka moporofeta Jehu. ₁₃E ne e le ka baka la dibe tsohle tsa Baesha, le tsa mora hae Ela, tseo ba sitilweng ka tsona, ba ba ba sebisa le Baiseraele, ba halefisa Jehova, Modimo wa Iseraele, ka diketso tsa bona tsa bosawana.

₁₄Haele taba tse ding tsa Ela le tsohle tseo a di entseng, ha ke re, di ngodilwe bukeng ya ditaba tsa ho phela ha marena a Iseraele?

₁₅Ka selemo sa mashome a mabedi a metso e supileng sa Asa, morena wa Juda, Simri a qala ho busa, a busa tshiu tse supileng Thirtsa.

Ke ha setjhaba se ne se lwantsha Gibbethone wa Bafilesta. ₁₆Setjhaba se lwantshang Gibbethone, eitse ha se utlwa ho thwe: Simri o fetohetse morena, o mmolaile tsatsing lona leo, Baiseraele bohle ba diahelong ba bea Omri, molaodi wa makgotla, e be morena wa Iseraele. ₁₇Yaba Omri o tloha Gibbethone, a ena le Baiseraele bohle, ba ya thibella Thirtsa. ₁₈Simri, ha a bona hoba motse o ya kenwa, a kena qhobosheaneng ya ntlo ya borena, a itjheseletsa tlung ya morena, a shwa. ₁₉A shwa ka baka la dibe tseo a sitilweng ka tsona, kamoo a kileng a etsa ho leng hobe kateng, mahlong a Jehova, a ya ka mehlala ya Jeroboame le ka sebe seo a sitilweng ka sona, a ba a sebisa le Baiseraele.

₂₀Haele ditaba tse ding tsa Simri, le kamoo a fetohetseng Ela kateng, ha ke re, di ngodilwe bukeng ya ditaba tsa ho phela ha marena a Iseraele?

₂₁Jwale, setjhaba sa Iseraele sa kgaohana koto tse pedi, se seng sa latela Thibni, mora Ginathe, ho mmea morena; se seng sa latela Omri. ₂₂Empa ba latetseng Omri ba hlola ba latetseng Thibni, mora Ginathe; yaba Thibni o a shwa, mme Omri ya eba morena.

₂₃Ka selemo sa mashome a mararo a motso o mong sa Asa, morena wa Juda, Omri a qala ho busa Iseraele; a busa ka lemo tse leshome le metso e mmedi; a busa ka tse tsheletseng a le Thirtsa. ₂₄A reka thaba ya Samaria ho Semere, ka silefera e talenta tse pedi, a ba a haha thabeng, a bitsa motse oo a o hahileng Samaria ka lebitso la Semere, mong a thaba.

₂₅Omri a etsa ho leng hobe mahlong a Jehova, a etsa hampe le ho fetisa bohle ba neng ba bile pele ho yena. ₂₆A ya ka mehlala yohle ya Jeroboame, mora Nebathe, le ka sebe seo a sebisitseng Baiseraele ka sona, Jehova, Modimo wa Iseraele, a tle a halefiswe ke diketso tsa bona tsa bosawana.

₂₇Haele taba tse ding tsa Omri, le matla ao a entseng ka wona, ha ke re, di ngodilwe bukeng ya ditaba tsa ho phela ha marena a Iseraele?

₂₈Omri a ntoo orohela ho bontatae, a patwa Samaria, mme mora hae Akabe ya eba morena tulong tsa hae.

₂₉Ka selemo sa mashome a mararo a metso e robileng meno e le mmedi sa Asa, morena wa Juda, Akabe, mora Omri, a qala ho busa Iseraele. Akabe, mora Omri, a busa Iseraele ka lemo tse mashome a mabedi a metso e mmedi, a le Samaria.

₃₀Akabe, mora Omri, a etsa ho leng hobe mahlong a Jehova le ho fetisa bohle ba bileng pele ho yena. ₃₁A etsa jwaloka eka ho bile honyenyane ho ya ka dibe tsa Jeroboame, mora Nebathe, a tlodisa ka ho nyala Jesebele, moradi wa Ethebaale, morena wa Basidone, a ya, a sebeletsa Baale, a mo kgumamela. ₃₂A etsetsa Baale aletare, tlung ya Baale eo a e hahileng Samaria. ₃₃Akabe a etsa le setshwantsho sa Ashtarothe, mme Akabe a etsa tse halefisang Jehova, Modimo wa Iseraele, ho fetisa marena wohle a Iseraele a bileng pele ho yena.

₃₄Mehleng ya hae, Hiele wa Bethele a haha Jeriko; a o thea ka ho senyehelwa ke Abirame, mora hae e moholo, a tiisa dikgoro tsa wona ka ho senyehelwa ke Segube, mora hae e monyenyane, ha eba jwalokaha Jehova a ne a boletse ka Joshua, mora Nune.