I DIKRONIKE 10

₁Eitse ha Bafilesta ba lwana le Baiseraele, banna ba Iseraele ba baleha pela Bafilesta, ba wa ba hlabilwe thabeng ya Gilboa. ₂Bafilesta ba phallela Saule le bara ba hae ka matla, mme Bafilesta ba bolaya Jonathane le Abinadabe le Malkishua, bara ba Saule. ₃Jwale, Saule a imelwa ke ntwa; ba fulang ka diqha ba mo fihlela, mme a tsieleha haholo ke ba diqha. ₄Yaba Saule o re ho lehlahana la hae: Pshemola sabole ya hao, o ntlhabe ka yona, esere mohlomong maqai ao a tla, mme a ntshoma. Empa lehlahana la hae la hana, kahobane le ne le tshohile haholo. Yaba Saule o nka sabole ya hae, a itihela hodima yona. ₅Eitse ha lehlahana la hae le bona hoba Saule o shwele, le lona la itihela hodima sabole ya lona, mme la eshwa. ₆Ha eshwa jwalo Saule le bara ba hae ba le bararo; ntlo ya hae kaofela ya eshwa hammoho. ₇Eitse banna bohle ba Iseraele ba ahileng kgohlong, ha ba bona hoba ho balehilwe, le hoba Saule le bara ba hae ba shwele, ba furalla metse ya bona, ba baleha. Mme Bafilesta ba fihla, ba aha ho yona.

₈Hosasane, ha Bafilesta ba tlile ho hlobodisa ba bolailweng, ba fumana Saule le bara ba hae ba wele thabeng ya Gilbowa. ₉Yaba ba mo hlobodisa, ba nka hlooho ya hae le dihlomo tsa hae; mme ba romela kahohle naheng ya Bafilesta ho ya behela medimo ya bona le setjhaba. ₁₀Ba bea dihlomo tsa hae tlung ya modimo wa bona, mme ba fanyeha hlooho ya hae tlung ya Dagone. ₁₁Eitse ha bohle ba Jabeshe-Gileade ba utlwa tsohle tseo Bafilesta ba di entseng ka Saule, ₁₂banna bohle ba matla ba ya, ba tlosa setopo sa Saule le ditopo tsa bara ba hae, ba di tlisa Jabeshe. Ba pata masapo a bona tlasa sefate sa terebinthe se Jabeshe, mme ba itima dijo ka matsatsi a supileng.

₁₃Saule a shwa jwalo ka baka la boikgantsho ba hae, boo a neng a ikgantsheditse Jehova ka jona, bakeng sa lentswe la Jehova leo a sa kang a le boloka, le bakeng sa hobane a ne a botsitse ba bitsang bafu, hore a ipotsetse ditaba ho bona, ₁₄a sa ka a botsa Jehova. Jehova a mo timetsa ke hona, mme a fetisetsa borena ho Davida, mora Jese.