UZAKARIYA 3

₁Yeke uSomnini wangikhombisa uJotjhuwa umphristi omkhulu ajame phambi kwesithunywa sakaSomnini, nomphikisi ajame ngesidleni sakhe ezele ukuzomphikisa.

₂Isithunywa sakaSomnini sathi kumphikisi: “USomnini uyakukhalima wena mphikisi ndina! USomnini okhethe iJerusalema uyakukhalima! UJotjhuwa lo, sikhuni esivuthako esikhutjhwe emlilweni!”

₃Yeke uJotjhuwa gade embethe izambatho ezikghamathele iinsila nakalokho ajame phambi kwesithunywa njalo. ₄Isithunywa sathi eengilozini ezijame phambi kwaso: “Mhlubuliseni iindwedwekazi azembethekwezi.” Sase sithi kuJotjhuwa: “Qala, ngisuse isono sakho, nje-ke ngizakwembathisa izambatho zakanokutjho.”

₅Yeke mina Zakariya ngathi: “Mthweseni iqubi lobuphristi elihlanzekileko ehlokwakhe.” Bamthwesa-ke iqubi elihlanzekileko ehlokwakhe bebamembathisa, isithunywa sakaSomnini silokhu sijame eqadi kwakhe.

₆Isithunywa sakaSomnini sathembisa uJotjhuwa sathi: ₇“USomnini uMninimandlawoke uthi, ‘Nawukhamba eendleleni zami; bese ulonda imiyalwami, utjheje ithempeli lami bewutlhogomele nesirhodlo sethempeli, yeke ngizakwenza ube nehlanganyelo neengilozi zami.’

₈“Lalela, wena mphristi omkhulu Jotjhuwa, kanye nedwendwe lakhwelo, niyelele itshwayeli: Ngizakuletha incekwami ekuthiwa nguHlumela. ₉Ngambala idwala engiliphathise uJotjhuwa, okulidwala elikhethekileko lifanekisa ukuba khona kwami, iye, ngizokuvula umthombalo bengirhurhule isono senarha le ngelanga linye tere.” Kutjho uSomnini uMninimandlawoke. ₁₀“Mhlokho kuzakwanda ukuthula kangangobana nizakuhlala ndawonye ngaphasi kwesidiribe namakhiwani.” Kutjho uSomnini uMninimandlawoke.