Ningazithokozisi nina kwaphela, thokozisani nabanye
1Thina esidzimeleleko kufanele sinyamezelele ukuhluleka kwabatekatekako, singazithabisi thina sodwa. 2Ngiloyo naloyo wethu akathabise umakhelwanakhe, kube kuhle kuye, naye akheke. 3UKrestu azange azithabise yena kwaphela, kodwana njengombana kutloliwe kwathiwa:
“Iinhlamba zabakuthukako,
ziwele phezu kwami.”
4Koke okwatlolwa ngaphambilini kwatlolelwa ukusifundisa ukuze kuthi ngokunyamezela nangokukhuthazeka kwemitlolo, sibe nethemba. 5Sengathi uZimu wokubekezela newokukhuthazeka anganipha ukuphilisana ngokuzwana ngokukaKrestu Jesu 6ukuze kuthi ngahliziyonye nangelizwi linye nidumise uZimu, uYise weKosethu uJesu Krestu.
7Yamukelanani njengombana uKrestu anamukela ukuze kudunyiswe uZimu. 8Ngiyanitjela ngithi uKrestu waba yinceku yabasokileko ngebanga leqiniso lakaZimu ukuze aqinise iinthembiso ezanikelwa abokhokho, 9nokobana abatjhili badumise uZimu ngebanga lesirhawu sakhe njengombana kutloliwe kwathiwa:
“Nje-ke ngizakudumisa Somnini,
hlangana nezizwe;
ngibhine iingoma zokudumisa ebizweni lakho.”
10Godu uthi:
“Thabani nina abatjhili
nikanye nabantu bakhe.”
11Godu kwathiwa:
“Dumisani uSomnini,
noke nina abatjhili;
abantu boke abamdumise.”
12Godu umphorofidi u-Isaya wabuye wathi:
“Ipande yakaJese izakuza,
iye, loyo ophakamela ukubusa abatjhili.
Abatjhili bazakuba nethemba kuye.”
13Sengathi uZimu wethemba anganizalisa ngethabo loke kanye nokuthula ekukholweni ukuze nande ethembeni, ngamandla kaMoya oCwengileko.
Isizathu sakaPowula sokutlola ngesibindi esingaka
14Ngizizwa nginethemba ngani bazalwana bami kobana nina ngokwenu nizele beniphelele ngelwazi nelemuko begodu niyakwazi ukuyalana. 15Nokho-ke nginitlolele ngesibindi kamanye amaphuzu ngokunikhumbuza ngebanga lomusa engiwuphiwe nguZimu 16kobanyana ngibe yinceku kaKrestu Jesu kabatjhili. Ngiphiwe umsebenzi wobuphristi bona ngimemezele ivangeli lakaZimu ukuze abatjhili babe mnikelo owamukelekako kuye, bacwengiswe ngoMoya oCwengileko. 17Yeke ngiyazigqaja kuKrestu Jesu emsebenzinami engiwenzela uZimu. 18Ngalokho angizukuvelela, ngikhulume ngananyana yini ngaphandle kwalokho uKrestu akwenze ngami kobana ngizuze ukuzithoba kwabatjhili ngamezwi nangezenzo, 19ngamandla weembonakaliso nemikarisomraro, ngamandla kaMoya kaZimu ukuze ngitjhumayele ivangeli lakaKrestu ukusuka eJerusalema ukuya mazombe ne-Iluriko. 20Bekuseze kuyitjisakalo yami ukutjhumayela ivangeli lapha uKrestu angakaziwa khona ukuze ngingakheli esisekelweni somunye 21njengombana umtlolo usithi:
“Labo abangazange khebatjelwe ngaye
bazakubona
nalabo abangazange khebezwe ngaye
bazakulemuka.”
UPowula ubhincela ukuya eRoma
22Ngilokho-ke ebekuseze kungibamba kanenginengi ukuza kini. 23Kodwana kwanjesi, njengombana kungasekho indawo ekumele ngisebenze kiyo eemfundenezi nje, begodu njengombana sele kuminyaka eminengi ngiseze ngihlulukela ukuza kini, 24ngihlela ukuzonibona lokha nangiya eSipeyini. Nginethemba lokobana ngizazonibona nangidlulako nginikhombele bona ningisize ekhambeni lami lapho nasele ngihlezahlezi nani isikhatjhana. 25Nokho-ke khona nje ngisaya eJerusalema ukuyokusiza abacwengileko lapho 26ngombana bathaba kwamambala beMasedoniya nebe-Arhaya ukubuthelela umnikelo wokusiza abadududu eJerusalema. 27Bakuthabela khulu ukwenza lokho begodu ngambala bebafanele babenzele ngombana nakube abatjhili bahlanganyela eembusisweni zamaJuda zakaMoya, kumele bahlanganyele namaJuda eembusisweni zabo zenyama. 28Nje-ke nasele ngiwuqedile umsebenzi lo, begodu sele ngiqinisekisile bonyana bafunyana iinthelo lezi, ngizokuya eSipeyini ngidlule nginibona. 29Ngiyazi bona lokha nangiza kini, ngizokuza ngokuphelela kwesibusiso sakaKrestu.
30Ngiyanincenga bazalwana, ngeKosi yethu uJesu Krestu nangethando lakaMoya kobana nihlanganyele nami ekutjhabatjhekeni kwami ngokungithandazela kuZimu. 31Iye, thandazani bonyana ngiphephe kabangakholwako eJudiya nokobana umsebenzami eJerusalema wamukeleke kabacwengileko lapho 32ukuze kuthi ngentando kaZimu, ngize kini ngethabo ngiphumule kanye nani. 33Sengathi uZimu wokuthula angaba nani noke. Amen.
