KWEBEROMA 13

₁Akube ngiloyo naloyo athobele ababusi ngombana awukho umbuso ongaveli kuZimu. Imibuso ekhona le ibekwe nguZimu. ₂Nje-ke nanyana ngubani ophikisana namandla wombuso, uphikisana nalokho okujanyiswe nguZimu. Labo abaphikisako bazakufumana isigwebo. ₃Ababusi abesabeki kilabo abaziphethe kuhle kodwana besabeka kilabo abaziphethe kumbi. Ungathanda bona ungabi nevalo nawubona isiphathimandla na? Khona-ke yenza okulungileko, sizakudumisa ₄ngombana umbusi uyinceku kaZimu ukuze kube kuhle kuwe. Kodwana nawenza okumbi, uzokuphila ngevalo ngombana umbusi akayiphatheli ilize isabula. Uyinceku kaZimu kobana ahlunguphaze labo abenza ubumbi. ₅Ngesizathweso-ke kufanele umuntu azithobe, ingasi ngokwesabela ukuhlunguphazwa kwaphela kodwana nangebanga lakanembeza.

₆Kungakho nikhupha nemithelo nje, ngombana ababusi baziinsebenzi zakaZimu eziqalene nomsebenzi wona lo. ₇Banikeleni koke okubafaneleko, khuphani umthelo kofanelwe mthelo, ingeniso kofanelwe lingeniso, ihlonipho kofanelwe yihlonipho nedumo kofanelwe lidumo.

₈Ningabi nomlandu wokubamba umuntu ilitho, ngaphandle komlandu wokuthandana ngombana loyo othanda omunye sele awuzalisile umthetho ngokwenza njalo. ₉Imiyalo ethi: “Ungahlobongi, ungabulali, ungebi, ungafisi komunye” kanye neminye imiyalo ekhona, ihlanganiswe yoke emyalweni owodwa othi: “Thanda umakhelwanakho njengombana uzithanda wena.” ₁₀Ithando alimtjhapheli umakhelwana, ngalokho ithando likuzaliseka komthetho.

₁₁Yenzani lokhu ngokuzwisisa isikhathi sanje. Isikhathi sesifikile sokobana nivuke ebuthongweni benu ngombana isindiswethu sele iseduze khulu kunangesikhathi esathoma ukukholwa ngaso. ₁₂Ubusuku sebuyadlula, ukukhanya sekutjhidele. Yeke asibekeleni ngeqadi izenzo zobumnyama, sihlome iinkhali zokukhanya. ₁₃Asiziphatheni ngokuhloniphekileko njengemini, kungabi ngokurhiribidela nokudakwa, kungabi ngobufebe nangamanyala begodu kungabi ngokucabana nangomona. ₁₄Esikhundleni salokho, yembathani iKosi uJesu Krestu, ninganikeli inyama ithuba lokwanelisa iinkanuko zayo.