ISAMBULO 8

₁Kuthe lokha iMvana nayinamulula iphawu lekhomba, kwathula pheze isiquntu se-awara ezulwini, kwathi du. ₂Nje-ke ngabona iingilozi ezilikhomba zijame phambi kwakaZimu; zanikelwa iimpalapala ezilikhomba.

₃Kwasuka enye ingilozi iphethe idengela legolide letjhwalo yajama e-aldarini. Yanikelwa itjhwalo elinengi bona ilinikele nemithandazo yabo boke abacwengileko phezu kwe-aldari legolide, okutjho eliphambi kwesihlalo sobukhosi. ₄Intuthu yetjhwalo kanye nemithandazo yabacwengileko yenyukela phambi kwakaZimu isuka esandleni sengilozi. ₅Nje-ke ingilozi yathatha idengela yalizalisa ngomlilo we-aldarini, yawurhatjha ephasini; kwaba khona ukuduma nokuraramba, ukuphazima kombani nokusikinyeka kwephasi.

₆Iingilozi ezilikhomba ebeziphethe iimporompita ezilikhomba zalungela ukuzivuthela.

₇Ingilozi yokuthoma yavuthela iporompita yayo, kwaba khona isinanja nomlilo kuvangene neengazi, kwathululelwa phezu kwephasi. Ingcenye yesithathu yephasi yatjhiswa; godu nengcenye yesithathu yemithi nakho koke okubutjani kwatjha kwalotha.

₈Ingilozi yesibili yavuthela iporompita yayo, kwabonakala isigidija esifana nentaba sinephuka umlilo, saphoswa ngelwandle. Ingcenye yesithathu yelwandle yaphenduka iingazi. ₉Ingcenye yesithathu yalokho okuphilako ngelwandle kwafa nengcenye yesithathu yemikhumbi yoniwa.

₁₀Ingilozi yesithathu yavuthela iporompita, ikwekwezi ekulu yawa ezulwini ibaneka njengesihlothi esivuthako; yawela engcenyeni yesithathu yemilambo nemithonjeni yamanzi. ₁₁Ibizo lekwekwezi leyo kwathiwa liNghana. Ingcenye yesithathu yamanzi yaphenduka yababa, kwafa abanengi ngamanzi lawo ngombana besele ababa.

₁₂Ingilozi yesine yavuthela iporompita yayo, kwathi ingcenye yesithathu yelanga, ingcenye yesithathu yenyezi nengcenye yesithathu yeenkwekwezi, iye, koke kwengcenye yesithathu yomkhanyo wakhona kwafiphala; azange kusaba khona ukukhanya engcenyeni yesithathu yemini, ngokunjalo nobusuku.

₁₃Ngisaqalile njalo, ngezwa ikhozi liphapha hlangana nesibanga lilila ngelizwi elikhulu lithi: “Maye! Maye! Maye kibo abakhileko ephasini! Bazozizwa ngokuzwakala kwezinye zeempporompita ezisazokuvuthelwa ziingilozi ezintathu.”