ISAMBULO 6

₁Nje-ke ngabona iMvana inamulula elinye lamaphawu alikhomba; ngezwa esinye seembunjwa ezine eziphilako sirhuwelela inga mdumo sithi: “Yewuze!” ₂Ngithe nangiqalako ngabona injomani emhlophe, umkhweli wayo gade aphethe umsebe; nje-ke wanikelwa isihlohlo, waphuma angohlulako, wahlula.

₃Kuthe lokha iMvana nayinamulula iphawu lesibili, ngezwa isibunjwa sesibili esiphilako simemeza sithi: “Yewuze!” ₄Nje-ke kwaphuma enye injomani ebovu be; umkhweli wayo wavunyelwa bona asuse ukuthula ephasini ukuze abantu babulalane, begodu wanikelwa isabula ekulu.

₅Kuthe lokha iMvana nayinamulula iphawu lesithathu, ngezwa isibunjwa sesithathu esiphilako simemeza sithi: “Yewuze!” Nje-ke ngaqala, qala bekunenjomani enzima, umkhweli wayo aphethe iinlinganiso ezimbili esandleni sakhe. ₆Ngezwa okungathi lilizwi hlangana neembunjwa ezine eziphilako lisithi: “Isiqwebu sinye sekoroyi ngesipaparwana neenqwebu ezintathu zebhali ngesipaparwana, kodwana ungoni amafutha we-oliva newayini!”

₇Lokha iMvana nayinamulula iphawu lesine ngezwa isibunjwa sesine simemeza sithi: “Yewuze!” ₈Ngithe nangiqalako, naso injomani etshetlha ibizo lomkhweli wayo nguKufa, alandelwa nguHadesi. Banikelwa amandla phezu kwengcenye yesine yephasi bona babulale ngesabula, ngendlala, ngezifo nangeembandana zommango.

₉Lokha iMvana nayinamulula iphawu lesihlanu, ngabona ngaphasi kwe-aldari imiphefumulo yalabo egade babulewe ngebanga lelizwi lakaZimu nangebanga lobufakazi ababe nabo. ₁₀Barhuwelela bathi: “Somnini Somandla, wena ocwengileko noqinisileko, kuzabe kube nini ngaphambi kobana ugwebe begodu usibuyiselele ngeengazi zethu na?” ₁₁Nje-ke omunye nomunye wanikelwa isambatho esimhlophe bekwathiwa akhe baphumule kwesikhatjhana bekuphelele isibalo seenceku abakanye nazo nesabazalwana ebebasazokubulawa njengabo.

₁₂Lokha iMvana nayinamulula iphawu lesithandathu, ngaqala, qala bekunokusikinyeka kwephasi okukhulu: Ilanga lafiphala laba nzima njengomsizi, inyanga yaba njengeengazi; ₁₃iinkwekwezi zesibhakabhaka zawela ephasini njengomuthi wamakhiwani nawuthintitha iinthelo zawo zebusika lokha nawusikinywa mumoya. ₁₄Isibhakabhaka sanyamalala njengomsongo nawusongeka wenyuka, iintaba neenhlengele zatjhidiswa eendaweni zazo. ₁₅Amakhosi wephasi, ababusi, iinkhulu, iinjinga neemphathimandla, omunye nomunye, olikhoboka nokhululekileko, bazifihla emarharheni naphakathi kwamadwala weentaba; ₁₆barhuwelela iintaba namadwala bathi: “Welani phezu kwethu nisisithe ebusweni balowo ohlezi esihlalweni sobukhosi nebukhalini beMvana! ₁₇Mbala ilanga elesabekako lelaka labo lifikile! Alo, ngubani ongalijamela na?”