AMARHUBO 9

₂USomnini ngizamdumisa ngehliziywami yoke.

Somnini, ngizakukhuluma ngeemangaliso zakho zoke.

₃Ngizakwenama, ngisase kuwe;

ngidumise ibizo lakho, Zimu ongoPhezulu.

₄Lokha izitha zami nazibalekako,

ziyawa, zibhubhe phambi kwakho.

₅Iye, uvikele ilungelo lami nendabami

uhlezi esihlalweni sobukhosi,

wena mGwebi olungileko.

₆Ukhalimele izizwe;

wabhubhisa iinkhohlakali;

ibizo lazo ulisulile isiphelani.

₇Izitha uzitjhabalalisile,

wasiphula amadorobhazo,

sele ayiququ isiphelani;

iye, ukukhunjulwa kwazo kuphelile.

Zipheliswe njalo-ke zona

₈ngombana uSomnini ubusa isiphelani.

Unzinzise nesihlalo sakhe sobukhosi bona agwebe.

₉Ngiyo obusa iphasi ngokulunga,

igwebe abantu ngokufaneleko.

₁₀USomnini usiphephelo sabagandelelweko,

iye, usiqongolo ngeenkhathi zokubandezelwa.

₁₁Abalaziko ibizo lakho

babeka ithemba labo kuwe

ngombana abakufunako

azange ubafulathele, Somnini.

₁₂Rhubelani uSomnini ohlala eZiyoni,

nimemezele izenzo zakhe ezizweni.

₁₃Obuyiselela iingazi,

wabakhumbula abazwiswa ubuhlungu,

azange akhohlwe isililo sabo.

₁₄Yiba nomusa kimi, Somnini!

Yelela isizi lami engilibangelwe ngabangizondako!

Nguwe ongihlenga emasangweni wokufa,

₁₅ukuze ngibabaze idumo lakho

begodu ngijabule esindiswenakho

emasangweni weZiyoni.

₁₆Bezizwe bawele ngemgodini abazembele wona,

inyawo labo libanjwe esifwini abasithiyileko.

₁₇USomnini uzazisile, bewabeka isigwebo;

iinkhohlakali zicutjhwe emsebenzini wezandla zazo.

₁₈Inga iinkhohlakali zingaya endaweni yabafileko,

iye, zoke izizwe ezikhohlwa uZimu.

₁₉Kodwana ngesikhathi soke odududu angakhohlweki,

nethemba labachakileko lingafeleli nini nanini.

₂₀Sikima Somnini, ungavumeli umuntu adlondlobale!

Izizwe azigwetjwe phambi kwakho!

₂₁Faka ivalo kabezizwe, Somnini,

ubenze bazi bonyana bangababhubhako!