AMARHUBO 84

₂Maye iyathandeka indlwakho,

Somnini, Mninimandlawoke!

₃Umphefumulwami uyalangazelela,

iye, ufisa ukuba sesirhodlweni sakaSomnini;

ihliziywami nomzimbami ululukela uZimu ophilako.

₄Zimami, Somnini,

ngitjho nemirwibili ifunyene ikhaya ema-aldarinakho.

Kosami, Mninimandlawoke,

nekonjani ifunyene indlwanayo

lapha ibeka khona amadzinyanayo.

₅Babusisiwe abahlala endlinakho

ngombana bakudumisa nini nanini.

₆Babusisiwe abantu amandlabo akuwe,

iye, labo abanhliziyo zinomendo weZiyoni.

₇Lokha nabadabula umrhoba wemithi yebhalisamu,

bawenza waba siyalu

nezulu lokuthoma lawusibekela ngitjho nangamachibi.

₈Baragela phambili ngamandla ekhambeni labo

ngombana bazakuvela phambi kwakaZimu eZiyoni.

₉Somnini, Zimu Mninimandlawoke,

yizwa umthandazwami,

beka indlebe Zimu kaJakopo.

₁₀Zimu, yelela umvikelethu,

uqale ubuso bomzeswakho.

₁₁Kwamambala, ilanga ngesirhodlweni sakho

lihle kunamalanga ayikulungwana kenye indawo.

Kungcono ngibe sembunjwaneni wendlu kaZimami,

kunokuhlala ematendeni weenkhohlakali

₁₂ngombana uSomnini uZimu ulilanga nesihlangu;

iye, upha umusa nokuhlonipheka.

Ayikho into ehle ayigodlako

kilabo abakhamba ngobuqotho.

₁₃Somnini, Mninimandlawoke,

ubusisiwe umuntu othembela kuwe!