AMARHUBO 78

Bantu bekhethu, lalelani ukufundisa kwami,

nibeke iindlebe zenu emezwini womlomami.

₂Ngizakuvula umlomami ngomfanekiso,

ngiphuphume iimfihlakalo zekadeni.

₃Izinto esizizwileko nesizaziko,

esatjelwa zona bobamkhulu,

₄angeze sazifihla eenzukulwaneni zabo;

sizokutjela nesizukulwana esizako

ngemikarisomraro kaSomnini namandlakhe,

kanye neemangaliso azenzileko.

₅Wajamisa ubufakazi kwaJakopo,

wabeka umthetho kwa-Israyeli

ayala ngawo abobamkhulu

kobana bawufundise abantwababo,

₆ukuze isizukulwana esilandelako siwazi,

iye, abantwana abasazakubelethwa.

Nabo basikime, batjele abantwababo

₇kobana babeke ithemba labo kuZimu.

Kumele bangakhohlwa imisebenzi kaZimu,

kodwana balonde imiyalwakhe.

₈Bangabi njengaboyisemkhulu

ebekusizukulwana esikhunyaleleko nesihlubukako;

iye, isizukulwana ebesinehliziyo enganaqiniso

nebesinommoya ongakathembeki kuZimu.

₉Bakwa-Efrayimu bebahlome ngemisubi nemisubela,

nokho bahlehla ngelanga lepi.

₁₀Akhange balonde isivumelwano sakaZimu

begodu bala ukwenza njengokweemfundiso zakhe.

₁₁Iye, bakhohlwa lokho akwenzileko

neemangaliso ababonisa zona.

₁₂Wenza iimangaliso phambi kwaboyisemkhulu

enarheni yeGibhide, emmangweni weTsowana.

₁₃Wahlukanisa ilwandle, wabeyamisa,

wajamisa amanzi aba njengedonga.

₁₄Emini wabarhola ngelifu,

ebusuku ngomkhanyo womlilo.

₁₅Waqhekeza amadwala erhalawumbeni,

wabaseza amanzi inga abuya esizibeni esikhulu.

₁₆Wathumbula iinkhukhula edwaleni,

wagelezisa amanzi ehla njengemilambo.

₁₇Nanyana kunjalo, bathuwelela ngokona kuye,

bahlubuka ongoPhezulu ebhudwini.

₁₈Bazizinya uZimu eenhliziyweni zabo

ngokubawa ukudla ngokukhaluza.

₁₉Bakhuluma kumbi ngoZimu, bathi:

“UZimu angalungisa isithebe erhalawumbeni na?

₂₀Wabetha idwala, kwaphuma amanzi

nemilanjana yagobhoza.

Kghani, angapha abantu bakhe ukudla,

abalungisele inyama na?”

₂₁Lokha uSomnini nezwa lokho,

wabila khulu, waphuphuma,

wavutha umlilo ngoJakopo,

ilaka lakhe larubha ngo-Israyeli

₂₂ngombana akhange bakholwe kuZimu

begodu azange bathembe amandla wesindiswakhe.

₂₃Nje-ke wayala umkayi phezulu,

wavula iminyango yezulwini,

₂₄wanisa imana phezu kwabo bona badle,

wabapha amabele wezulwini.

₂₅Abantu badla isikwa seengilozi,

wabathumela umphako omnengi.

₂₆Wavunguzisa ummoya wepumalanga ukusuka phezulu,

ngamandlakhe waphephethisa ummoya wangesewula.

₂₇Wabehlisela inyama yaba yinengi njengethuli,

iinyoni eziphapha njengetjhwabatjhwaba yelwandle.

₂₈Wazenza zidoyele ekabeni yekampakhe,

iye, ethaberinakelini lakhe zombelele.

₂₉Badla bebasutha sentwala!

Wabapha ebebakukhanukela.

₃₀Kodwana bathi basakhanuka inyama,

iye, isesemlonyenabo njalo,

₃₁ubukhali bakaZimu babavukela.

Wabulala abazimukileko phakathi kwabo,

wadula phasi amasokana wakwa-Israyeli.

₃₂Ngaphezu kwakho koke lokho

baragela phambili nokona;

akhange bazethembe iimangaliso zakhe.

₃₃Yeke, waphelisa amalangabo njengomphefumulo

neminyakabo ekwesabeni.

₃₄Lokha nasele ababulalako, bamfuna,

baphenduka bafunisisa uZimu.

₃₅Bakhumbula bona uZimu ulidwala labo,

uZimu ongoPhezulu umhlengabo.

₃₆Kodwana bamkhohlisa ngemilomabo,

baleya kuye amala ngamalimabo.

₃₇Ihliziywabo akhange ibe neqiniso kuye

bebangakathembeki esivumelwaneni sakhe.

₃₈Phezu kwalokho yena waba nomusa,

wacolela ubumenemene babo;

iye, akhange ababhubhise,

wazibamba kanengi elakeni lakhe,

azange aveze boke ubukhali bakhe.

₃₉Wakhumbula ukuthi bayinyama nje,

bamumoya odlulako nongasabuyiko godu.

₄₀Kwaba kanengi kangangani bamhlubuka erhalawumbeni,

iye, bamdanisa enarheni elibhudu.

₄₁Bazizinya uZimu kanenginengi,

barhuga ongoCwengileko wakwa-Israyeli.

₄₂Akhange bakhumbule amandlakhe

emalangeni abasindisa ngawo esitheni,

₄₃lokha enza iimbonakaliso zakhe eGibhide

neemangaliso endaweni yeTsowana:

₄₄Waphendula imilanjana yeNayili iingazi,

azange bakwazi ukusela emilanjenabo.

₄₅Wabathumela ngeembawu ezabadlako

neenrhwarhwa ezabhubhisako.

₄₆Wanikelela iintjalo zabo ngentethe,

iinthelo zomsebenzabo ngesikhonyani.

₄₇Warhayila iindiribe zabo ngesinanja

namakhiwani wommango ngesikhukhula.

₄₈Waphobolisa iinkomo zabo ngesinanja

nemihlambabo ngombani womphezulu.

₄₉Wehlisela phakathi kwabo ilaka lakhe elivuthako:

ubukhali, itukuthelo namatshwenyeko;

iye, iwoma leenthunywa ezibhubhisako.

₅₀Wavula indlela yelaka lakhe,

akhange abababalele bona bangafi,

kodwana wanikelela ipilwabo ngezifo.

₅₁Warhayila woke amazibulo eGibhide,

iye, isithelo sokuthoma sobudoda ematendeni kaRhamu.

₅₂Nje-ke wakhupha abantu bakhe njengezimvu,

wabarhola erhalawumbeni njengomhlambi.

₅₃Wabelusa ngokuthula ukuze bangesabi

ngombana ilwandle labhibha izitha zabo.

₅₄Wabaletha emkhawulwenakhe ocwengileko,

enarheni yeentaba ethunjwe sisidla sakhe.

₅₅Waqotjha izizwe phambi kwabo;

wabahlukanisela inarhazo njengelifa labo,

wanzinzisa iinkoro zakwa-Israyeli eendaweni zazo.

₅₆Nanyana kunjalo

bazizinya uZimu ongoPhezulu;

bamhlubuka ngokungalondi iimiso zakhe.

₅₇Baba nokungathembeki,

bahlehla sinyava njengaboyisemkhulu.

Bahluleka njengomsebe ongazisiko.

₅₈Bamtlhorholoja ngeendunduma zabo,

bamnyenyisa ngeenthombe-mbazwa zabo.

₅₉Lokha uZimu nabona lokho,

wabila khulu waphuphuma,

walahla u-Israyeli ngokupheleleko.

₆₀Watjhiya indawakhe ngeTjhilo

ekulitende ahlala kilo hlangana nabantu.

₆₁Wanikela amandlakhe ekuthunjweni,

iye, igugu lakhe esandleni sesitha.

₆₂Wanikelela abantu bakhe esabuleni,

wabila khulu ngelifa lakhe.

₆₃Amasokanabo adliwa mlilo,

iintombi zabo azange zivunyelwe irhalani.

₆₄Abaphristi babo bawa ngesabula;

abahlolokazi babo akhange balile.

₆₅Nje-ke uSomandla wavuka inga uvuka ebuthongweni,

njengengorho ebeyihlulwe liwayini,

₆₆wahlula izitha zakhe ngokuzidedisa,

wazithela ngeenhloni ezingapheliko.

₆₇Walahla itende lakaJosefa,

akhange akhethe ikoro ka-Efrayimu.

₆₈Kodwana wakhetha ikoro yakwaJuda

nentaba yeZiyoni ayithandako.

₆₉Wakha indawakhe ecwengileko yaphakama

nanjengephasi wayijamisela iinsekelo isiphelani.

₇₀Wakhetha uDavida incekwakhe,

wamsusa eembayeni zezimvu.

₇₁Ekweluseni izimvukazi ezimunyisako,

wamthatha bona eluse abantu bakhe uJakopo

nelifa lakhe u-Israyeli.

₇₂Wabelusa ngehliziyo eqotho,

wabarhola ngekghono lesandla sakhe.