AMARHUBO 74

Awu Zimu, usilahleleni isiphelani na?

Kubayini ilaka lakho livuthe

phezu komhlambakho?

₂Khumbula ibandla lakho owalizuza ekadeni,

ikoro yelifa lakho owayihlengako

nentaba yeZiyoni ohlala kiyo.

₃Yewize emarubhini wesiphelani;

endaweni ecwengileko isitha sone yoke into.

₄Amanabakho arore ekabeni yehlanganwakho,

ajamisa amatshwaywawo khonapho.

₅Njengabaphakamisa iinlembe

ukuze bakghedlhe ihlathi eliminyeneko,

₆amanaba eza njalo ngamazembe nemigqala,

aphohloza nya umsebenzayo obaziweko.

₇Okhele indawakho ecwengileko ngomlilo,

ayitjhisa ngokuyidula phasi;

asilaphaza indawo lapha kuhlala ibizo lakho.

₈Adlumbana athi: “Asiqedeni koke!”

Nje-ke atjhisa zoke iindawo zemihlangano kaZimu enarheni.

₉Amatshwaywethu asiwaboni;

njengombana kungekho umphorofidi

akakho kithi owaziko bona kuzabe kube nini kunjalo.

₁₀Zimu, umjamelani uzasiphoqa bekube nini?

Isitha sizakuhlambalaza ibizo lakho isiphelani na?

₁₁Kubayini ugodla isandla sakho?

Rhotjha isidla sakho usiqede!

₁₂Zimu, kwakade wena uyiKosami,

wenza imisebenzi yokusindisa phakathi kwenarha.

₁₃Nguwe owaphehla ilwandle ngamandlakho,

waphohloza iinhloko zeembandana ezikulu zemanzini.

₁₄Iye, nguwe owaphihliza iinhloko zakanomrhaso welwandle,

wamenza bona abe kukudla kweendalwa zerhalawumba.

₁₅Nguwe owabhoboza imithombo nemilanjana,

godu nguwe owomisa imilambo ehlala igeleza.

₁₆Ngeyakho imini, godu nobusuku ngebakho;

nguwe owabeka inyezi nelanga.

₁₇Nguwe owajamisa yoke imikhawulo yephasi,

iye, nguwe owenza ihlobo nobusika.

₁₈Khumbula lokhu, Zimu:

Izitha ziphoqe wena, Somnini

neendlhayela zihlambalaze ibizo lakho.

₁₉Unganikeli izuba lakho eembandaneni;

iye, ipilo yabeyame kuwe,

ungayikhohlwa nini nanini.

₂₀Khumbula isivumelwano

ngombana iindawo ezimnyama enarheni,

zigcwele ubudlova.

₂₁Ungajikisi ogandelelweko adanile!

Yenza isichaka nodududu badumise ibizo lakho.

₂₂Sikima Zimu, jamela indabakho;

khumbula, iindlhayela ziyakuphoqa imihla yoke.

₂₃Ungakhohlwa itjhada lamanabakho,

iye, umkhosi wabajamelani bakho,

ohlala ukukholile.