AMARHUBO 61

₂Zimu, yizwa umkhosi wesililo sami,

ulalele umthandazwami.

₃Ngilila kuwe ngisepelazwe,

lokha ummoyami nawuphasi.

Ngirholele edwaleni eliphakemeko kunami

₄ngombana kimi bewusoloko usiphephelo,

umbhotjhongo oqinileko kude nezitha.

₅Ngifisa ukuhlala etendeni lakho nini nanini,

ngikhosele ngekhwapheni lamaphikwakho.

₆Mbala, wena Zimu uzwile iimfungo zami,

waphetha isibawo salabo abesaba ibizo lakho.

₇Yeleka ubude bepilo yekosethu,

welulele iminyakayo eenzukulwaneni ezinengi.

₈Kwanga ingahlala esihlalweni sobukhosi

phambi kwakaZimu nini nanini.

Thumela ukwethembeka neqiniso,

kobana kuyilonde.

₉Ngalokho ngizakudumisa ibizo lakho

ngesikhathi soke,

lokha nangizalisa iimfungo zami imihla ngemihla.