AMARHUBO 50

UZimu ongaphezu kwabosingazimu

okutjho uSomnini, uyakhuluma;

ubiza iphasi kusukela epumalanga

bekube setjingalanga.

₂Kusukela eZiyoni elipheleleko ngobuhle,

uZimu ukhanya ngokudarhileko.

₃UZimethu uyeza begodu angeze athula,

phambi kwakhe kunomlilo oqothulako,

uphahlwe siwuruwuru esesabekako.

₄Ubiza amazulu phezulu kanye nephasi

kobana agwebe abantu bakhe,

₅athi: “Ngibuthelani abathembekileko bami,

labo abenza isivumelwano nami ngomhlabelo.”

₆Amazulu amemezela ukulunga kwakhe,

athi: “Mbala, uZimu umugwebi!”

₇UZimu uthi:

“Yizwani nina bantu bami, ngizakukhuluma,

wena Israyeli, ngizakufakaza ngokujamelana nawe.

NginguZimu, uZimakho.

₈Angikukhalimi ngebanga lemihlabelwakho, Israyeli.

Imihlabelwakho yokutjhiswa ihlala iphambi kwami njalo.

₉Angidingi ukuthatha ikunzi emizinenu,

namkha iimbuzi eembayeni zenu

₁₀ngombana zingezami zoke iinyamazana zehlathi

neenkomo ezisemibundwini eyikulungwana.

₁₁Ngazi zoke iinyoni zeentatjana

neenkhakhabi zommango zingezami.

₁₂Ibe thana bengilamba, bengingeze nganitjela

ngombana iphasi nakho koke okukilo kungekwami.

₁₃Kanti mina ngidla inyama yeenkunzi,

ngisele iingazi zeembuzi na?

₁₄Yenzani ukuthokoza kwenu kube mhlabelo kuZimu,

niphethe iinthembiso zenu kongoPhezulu.

₁₅Ngibizani ngelanga lembandezeleko,

mina ngizanitjhaphulula,

nina nizangihlonipha.”

₁₆Kodwana kokhohlakeleko uZimu uthi:

“Unelungelo liphi lokumemezela iimiso zami

bewukhulume ngesivumelwano sami na?

₁₇Wena uzonda ukusolwa

namezwami uwaphayela ngemva kwakho.

₁₈Lokha nawubona isela, uvumelana nalo;

umdibi munye neenhlobongi.

₁₉Uliselela umlomakho kibo boke ubumbi,

ubophele ilimu lakho ekohlisweni.

₂₀Uditjha ngokunyefula umfowenu,

uhlebe umntwanakwenu.

₂₁Nawenza lokhu, kufuze ngithule na?

Udlumbana bona nami ngifana nawe?

Awa, ngiyakukhalima,

ngibeke iimphambeko zakho phambi kwakho.

₂₂“Yelelani indaba le,

nina enikhohlwa uZimu,

nakungasinjalo ngizanidabula,

kutlhogeke nomenyeli.

₂₃Loyo oletha ukuthokoza njengomnikelwakhe,

uyangihlonipha;

owenza ngendlela leyo,

ngizomambulela isindiso kaZimu.”