AMARHUBO 5

₂Hawu Somnini, beka indlebe emezwinami,

uzwe ukububula kwami.

₃Yelela ilizwi lesililo sami,

wena Kosami noZimami

ngombana ngithandaza kuwe.

₄Kosami, ulalela ilizwi lami ekuseni;

kuthi ngamasa ngendlale isibawo sami phambi kwakho

ngiyalindele.

₅Wena awusuye uZimu ozwana nekohlakalo,

okumbi angeze kwahlala kuwe.

₆Abazitjhayako angeze bajama phambi kwakho,

boke abenzi bobumbi uyabazonda.

₇Abakhuluma amanga uyababhubhisa.

Iye, uSomnini uyamnyenya umbulali nomkhohlisi.

₈Kodwana mina,

ngomusakho omkhulu ngingangena endlinakho,

ngokukuhlonipha ngizakukhothama

ngethempelini lakho elicwengileko.

₉Somnini, ngebanga lezitha zami,

ngirhole ngokulunga kwakho,

yenza indlelakho ihlelembe phambi kwami.

₁₀Ngambala akunaqiniso emlonyenazo,

imizindlwazo igcwele ukubhubhisa,

umphimbazo ulithuna elivulekileko,

ilimu lazo likabili.

₁₁Zimu, zenze zithwale icala lazo,

amaqhingazo abe kukuwa kwazo.

Ziqotjhe ngebanga leemphambeko zazo ezinengi

ngombana zikuhlubukile.

₁₂Yenza boke abaphephela kuwe bathabe,

benze bahlale bavuma iingoma ngokwenama.

Yembesa isivikelo sakho phezu kwabo,

abakhathalela ibizo lakho basase kuwe.

₁₃Mbala Somnini, nguwe obusisa abalungileko,

umusakho ubavikela mazombe njengesihlangu.