AMARHUBO 49

₂Yizwani lokhu noke nina zizwe,

iye, noke nina enakhileko ephasini.

Bekani indlebe

₃nina bantukazana neenkhulu,

nani njinga nabadududu noke.

₄Umlomami uzakukhuluma ukuhlakanipha,

ukuzindla kwehliziywami ngizakwenza kuzwisiseke.

₅Izaga ngizilalelisisa kuhle,

ngirarulule iinrarejo zami ngomvumo weharibha.

₆Alo, kubayini kufuze ngesabe ngesikhathi esimbi,

lokha ubukhohlakali babakhohlisi nabungizombileko,

₇okutjho labo abathemba umnothwabo,

nabazigqaja ngobukhulu bobunjinga babo na?

₈Mbala, umnotho lowo

angeze wahlenga umuntu.

Umuntu angeze awunikela uZimu

kobana ube sihlengo sakhe.

₉Isihlengo sepilo yabantu sibiza khulu,

yeke umuntu akakhohlwe nokukhohlwa

₁₀kobana angaphila ngaso isiphelani

ukuze angasaboni ukufa.

₁₁Ngambala kuyakhanya:

Abahlakaniphileko bafa ngokufanako

neendlhadlha neeyila.

Bayabhubha, umnothwabo usalele abanye.

₁₂Amathuna alikhaya labo nini nanini,

iye, bazakuhlala kiwo iinzukulwana ngeenzukulwana,

nanyana banamasimu abizwa ngamabizwabo.

₁₃Umuntu angeze ahlala namagugwakhe isiphelani,

ufana neembandana ezibhubhako.

₁₄Injalo indlela yabazethembako

nalabo abathokozele amezwabo

ngemva kokufa kwabo.

₁₅Njengezimvu babuthelelwe endaweni yabafileko

ukufa kuyabelusa.

Ekuseni abaqotho bagadanga phezu kwabo,

isibumbeko sabo sitjhabalaliswa yipethu,

indawo yabafileko izakuba likhaya labo.

₁₆Kodwana uZimu uzakuhlenga umphefumulwami

esandleni sokufa,

iye, angisuse.

₁₇Ungadani lokha omunye nanjingako,

nalokha umnotho wendlwakhe nawukhulako

₁₈ngombana nafako akazukuthatha litho,

umnothwakhe angekhe wehle naye.

₁₉Abantu bayamdumisa umuntu

lokha nazenzela okuhle.

Kodwana nanyana aziphakamisa epilwenakhe,

₂₀uzakuya kiboyisemkhulu,

abangeze basabona ukukhanya nini nanini.

₂₁Umuntu onomnotho kodwana anganalwazi

ufana neembandana ezifako.