AMARHUBO 44

₂Zimu, sizwile ngeendlebe zethu,

abokhokho bethu basitjelile,

ngemisebenzi oyenzileko emihleni yabo,

iye, emihleni yakade.

₃Nguwe owaqotjha bezizwe ngesandla sakho,

kodwana abokhokho wabatjala.

Nguwe owahlunguphaza izizwe,

kodwana abokhokho wabatjhaphulula.

₄Ngambala ngeenhlabano zabo,

azange bathumbe inarha,

namkha bahlule ngeenkhwepha zabo.

Kwaba ngesidla sakho nangengalwakho

nokukhanya kobukhona bakho

ngombana bewubathanda.

₅Wena Zimu, uyiKosami,

yeke layeza ukuhlula kwakaJakopo.

₆Ngesizo lakho sizakutlhofoza izitha zethu;

ngebizo lakho sizakugadangela abasivukelako.

₇Angithembeli emsebenami

nesabulami angeze yangisindisa.

₈Ngambala, wena usisindisile ezitheni zethu

bewaphoqa abasizondako.

₉Woke amalanga sazigqaja ngawe, Zimu,

sadumisa ibizo lakho ngesikhathi soke.

₁₀Nokho sewusilahlile, bewasirhubutjha

begodu awusaphumi nezipi zethu.

₁₁Usenze sabalekela izitha

nabasizondako bazizuzele ipango.

₁₂Usenze safana nezimvu zokuhlatjwa

bewasihlakazela ezizweni.

₁₃Uthengise isizwe sakho ngetupurujwana,

akhange usibize inani eliphezulu nawusithengisako.

₁₄Usenze isiphoqo sabomakhelwana bethu,

isithuko nesinyefulo kilabo abasiphahlileko.

₁₅Usenze isaga hlangana nabezizwe

nehlekiso phakathi kwabantu.

₁₆Ilanga loke ihlazo lami liphambi kwami

nobuso bami bugcwele iinhloni,

₁₇ngebanga lamezwi wabangiphoqako nabangithukako,

iye, nokobana ngiphambi kwesitha nakumbuyiseleli.

₁₈Koke lokho kusehlele;

nokho asikakukhohlwa wena,

namkha sibe bakhohlisi esivumelwaneni sakho.

₁₉Ihliziywethu akhange ihlanuke

namagadangwethu akhange asuke endlelenakho,

₂₀kobana ungabeze usiphahlazele edzabeni labophagana

bewusigubuzese ngethunzi elesabekako.

₂₁Nangathana besikhohlwe ibizo lakaZimethu,

namkha selulela izandla zethu kuzinyana othileko,

₂₂uZimu gade angekhe akubone lokho na?

Angitjho yena wazi iimfihlo zehliziyo!

₂₃Ngebanga lakho sibulawa imihla yoke,

sesesifana nezimvu zokuhlatjwa.

₂₄Somandla, akhe uvuke!

Ulaleleni kanti?

Sikima, musa ukusilahla isiphelani!

₂₅Ubufihlelani ubuso bakho na?

Kubayini ukhohlwe iinhlungu

nokugandelelwa kwethu?

₂₆Ngambala, umphefumulwethu unyelela ethulini;

imizimbethu inamathele ehlabathini.

₂₇Sikima, uze kobana usisize!

Yewusihlenge ngebanga lokwethembeka kwakho.