AMARHUBO 33

₁Hlokomani kuSomnini nina balungileko!

Iye, ukudumisa kungokwabaqotho!

₂Dumisani uSomnini ngeharibhana,

nimbethele iharibha leenara ezilitjhumi!

₃Mrhubeleni ingoma etja,

niyibethe kuhle ngeenara, nihlokome!

₄Mbala, ilizwi lakaSomnini liliqiniso,

zoke izenzo zakhe zikukwethembeka.

₅Uthanda okufaneleko nokulungileko,

iphasi ligcwele ukwethembeka kwakaSomnini.

₆Ngelizwi lakaSomnini, kwadaleka umkayi,

iye, ngokukhuluma kwakhe

kwenzeka koke okukiwo.

₇Wabuthelela amanzi welwandle

kwanga angemgqomini;

wabeka amanzi amanengi ngeenlulwini.

₈Iphasi loke alimesabe uSomnini;

kuthi zoke izakhamuzi ephasini,

zithuthumele ngaye

₉ngombana wakhuluma, kwadaleka,

wayala, kwaba khona.

₁₀USomnini uhlangahlanganisa iinhloso zezizwe,

araranise amaqhinga wabantu.

₁₁Iinhloso zakaSomnini zijame isiphelani,

iqhinga lakhe lingelanini nanini.

₁₂Sibusisiwe isizwe uZimaso kuSomnini,

isizwe uSomnini azikhethele bona sibe lilifa lakhe.

₁₃USomnini ubona phasi asezulwini,

aqale woke umuntu.

₁₄Esihlalweni sakhe

uyelela boke bephasi.

₁₅Yena owadala iinhliziyo zabo boke,

uqaphela zoke izenzo zabo.

₁₆Amakhosi akahluli ngobunengi bebutho lawo

neengorho azisindi ngobukhulu bamandlazo.

₁₇Iinjomani zepi zilithemba elililize ekusindiseni

begodu azihlengi ngobukhulu bamandlazo.

₁₈Kwamambala, ilihlo lakaSomnini liphezu kwabamesabako,

iye, phezu kwabaqalelele ukwethembeka kwakhe,

₁₉kobana atjhaphulule ipilwabo ekufeni,

abalonde baphilile ngesikhathi sendlala.

₂₀Umphefumulwethu ulindela uSomnini;

yena ulisizo nesihlangu sethu.

₂₁Iinhliziyo zethu zenamile kuye

ngombana sithemba ibizo lakhe elicwengileko.

₂₂Somnini, ukwethembeka kwakho

akube phezu kwethu

ngombana siqalelele wena.