AMARHUBO 27

USomnini ukukhanya nesindiswami,

ngizakwesaba bani na?

USomnini ubuphephelo bokuphila kwami;

alo, ngizakuba nevalo ngobani na?

₂Lokha abenzi bobumbi nabatjhidela kimi

kobana bangidle ngiphila,

iye, izitha nabajamelani bami,

ngibo abakhutjhwa bebawe.

₃Nanyana ibutho lingivimbezela,

ihliziywami ayinavalo;

nalokha ngivukelwa yipi,

nalapho nginethemba.

₄Kunye engikubawa kuSomnini

begodu ngizakulandelela lokho:

Kukobana ngihlale ngekumbeni kaSomnini,

amalanga woke wokuphila kwami,

nje-ke ngizazizwela umusa kaSomnini

nokuhlahlwa ethempelini lakhe.

₅Yena uzongibhacisa emtlhatlhanenakhe

ngelanga elimbi,

angifihle ekusithekeni kwetende lakhe,

iye, uzongibeka ekuphakameni phezu kwedwala.

₆Yeke ihlokwami iphakamile

ngehla kwezitha zami ezingizombelezileko;

ngizakunikela iminikelo yokuhlokoma etendeni lakhe,

ngizakuvuma, ngidumise uSomnini.

₇Ngizwe Somnini lokha nangilila ngelizwi elikhulu;

yiba nesirhawu kimi, ungiphendule!

₈Ihliziywami ikhumbula bona uthe:

“Funani ubuso bami!”

Nje-ke, ubuso bakho Somnini, ngizabufuna,

₉ngalokho ungabufihli kimi.

Ungayiqotjhi incekwakho ngetukuthelo;

wena ube lisizo lami, ungangilahli;

ungangitjhiyi, wena Zimu wesindiswami.

₁₀Ubaba nomma bangangitjhiya,

kodwana uSomnini uzangamukela.

₁₁Somnini, ngifundise indlelakho,

ngirhole emzileni olelezekileko

ngenca yezitha zami.

₁₂Unganginikeleli entandweni yamanabami

ngombana abofakazi bamanga bangivukele,

iye, bafuthekile ngenturhu.

₁₃Mbala ngiyakholwa

bonyana ngizazizwela ukulunga kwakaSomnini

ngisesephasinapha.

₁₄Qalelela uSomnini, uqine,

ihliziywakho ibe nesibindi;

iye, qalelela uSomnini.