AMARHUBO 21

₂Zimu, emandlenakho ikosethu iyathaba,

ekuhluleni kwakho idumisa ngamandla!

₃Iye, uyiphile isifiso sehliziywayo

nesibawo seembhena zayo akhange usigodle.

₄Uyihlangabeze ngeembusiso ezihle,

wayithwesa isihlohlo segolidembala.

₅Yabawa ukuphila kuwe, wayinikela khona;

iye, wayipha amalanga amanengi, isikhathi eside.

₆Idumo layo likhulu ngenca yokuhlula kwakho,

ubeke ukuhlonitjhwa nobukhosi phezu kwayo.

₇Mbala, ubeke kiyo iimbusiso nini nanini,

wayijabulisa khulu ngobukhona bakho.

₈Ngebangelo ikosi yethemba uZimu,

nje-ke, ngokwethembeka kwakaZimu ongoPhezulu,

angeze yazanyazanyiswa.

₉Ngwenyama, isandla sakho sizozifunyana zoke izitha zakho;

sokudla sakho sizabafunyana abakuzondako.

₁₀Lokha nawubonakalako,

uzazenza zibe njengekehla yomlilo.

UZimu uzaziginya ngelaka lakhe,

ziqothulwe mlilo.

₁₁Inzalwazo uzoyitjhabalalisa ephasini,

iye, isizukulwana sazo hlangana nabantu.

₁₂Lokha nazikuphendukela ngobumbi,

zikubophele izungu,

angeze zaphumelela.

₁₃Mbala, uzazenza zibaleke,

lokha nawuzinemba ngemisebakho ebusweni bazo.

₁₄Phakama Zimu, emandlenakho!

Thina sizakuvuma, sidumise imisebenzakho emikhulu.