AMARHUBO 135

₁Haleluya!

Dumisani ibizo lakaSomnini,

mdumiseni nina nceku zakhe,

₂iye, nina enilotjha endlini kaSomnini,

esirhodlweni sethempeli lakaZimethu.

₃Dumisani uSomnini ngombana ulungile,

nirhubele ibizo lakhe,

ngombana lihle.

₄Mbala, uSomnini ukhethe uJakopo

bona abe ngowakhe,

iye, u-Israyeli abe lilifa elingelakhe.

₅Kwamambala ngiyazi bona uSomnini mkhulu;

iye, iKosethu yikulu ngaphezu kwabo boke abosingazimu.

₆USomnini wenza koke akuthandako

ezulwini nephasini,

iye, emalwandle nekuzikeni koke.

₇Nguye okhuphula amafu amhlophe

emikhawulweni yephasi;

wenzela izulu imibani;

nguye ovuthela ummoya eenlulwini zakhe.

₈Nguye owarhayila amazibulo wamaGibhide,

iye, amazibulo wabantu nefuyo.

₉Wathumela iimbonakaliso nemikarisomraro

phakathi kwakho, wena Gibhide,

ngokujamelana noFaro neenceku zakhe zoke.

₁₀Nguye owamadlha izizwe ezinengi,

wabulala amakhosi anamandla:

₁₁uSirhoni ikosi yama-Amori,

u-Ogi ikosi yeBhatjhani

namakhosi wemibuso yoke yeKanana.

₁₂Wanikela inarhawo kobana ibe lilifa,

iye, ilifa labantu bakhe, u-Israyeli.

₁₃Somnini, ibizo lakho lijame isiphelani,

isinanazelo sakho ngeseenzukulwana ngeenzukulwana,

₁₄ngombana uSomnini umela abantu bakhe,

abe nesirhawu eencekwini zakhe.

₁₅Abosingazimu bezizwe

balisiliva negolide,

benziwe ngezandla zomuntu:

₁₆Banemilomo kodwana ayikhulumi;

banamehlo kodwana akaboni.

₁₇Baneendlebe kodwana azizwa;

banjalo nje abanammoya emilonyenabo.

₁₈Ababenzileko bafana nabo;

banjalo-ke boke abathembela kibo.

₁₉Wena ndlu ka-Israyeli, dumisani uSomnini!

Wena ndlu ka-Aroni, dumisani uSomnini!

₂₀Wena ndlu kaLevi, dumisani uSomnini!

Nani enesaba uSomnini, mdumiseni!

₂₁Akadunyiswe uSomnini aseZiyoni,

iye, yena ohlala eJerusalema.

Haleluya!