Ukubawa ukulanyulelwa nokubuyiselelwa
1Kumkhaleli; irhubo lakaDavida.
Ungathuli Zimu wendumiswami
2ngombana imilomo ekhohlisako
ivulekile ngokujamelana nami,
ikhuluma amanga ngami.
3Bangizombeleze ngamezwi wezondo,
bangisahlela ngaphandle kwesizathu.
4Ngenca yethando lami, bayangisola,
ngitjho nanyana ngisemthandazweni.
5Bangibuyisela okumbi esikhundleni sokuhle
nezondo esikhundleni sethando lami.
6Bathi: “Bekani isikhohlakali sifakaze
ngokujamelana naye,
iye, ummangaleli ajame ngesidleni sakhe.
7Lokha nabangiswako,
akafunyanwe amlandu;
ngitjho nomthandazwakhe
awuthathwe njengesono!
8Amalangakhe akancitjhiswe,
omunye athathe isikhundla sakhe.
9Abantwabakhe ababe ziintandani
nomkakhe abe mhlolokazi.
10Abantwabakhe ababe bozulani, bakhombele,
bafune ukudla emarubhini wekhabo.
11Umatjhonisa akamthathele koke anakho
nemiqhamuka iphange umsebenzi wezandla zakhe!
12Akungabikhona oba nesisa kuye,
namkha arhawukele abantwabakhe nabaziintandani.
13Iinzukulwana zakhe azijutjwe,
iye, amabizwazo asulwe
esizukulwaneni esilandelako!
14Icala laboyise beenzukulwanezo
alikhumbuleke phambi kwakaSomnini
nesono sabonina singasuleki.
15Izono zazo azihlale ziphambi kwakaSomnini,
yena aphelise ukukhunjulwa kwazo ephasini
16ngombana umuntu loyo
akhange akhumbule ukubonisa isisa,
kodwana walandelela iinchaka nabadududu
kanye nabanehliziyo eyaphukileko
bekwaba sekufeni.
17Wathanda ukuthuwelelisa ngamanikelela,
yeke amanikelela akawele kuye;
Akhange athande ukubusisa,
nje-ke akube kude naye!
18Iye, amanikelela akamembathe njengengubakhe,
angene ngaphakathi kwakhe njengamanzi
nanjengamafutha azeswe emzimbenakhe!
19Kuye akabe njengesambatho esimphuthelako
nanjengebhande alithekeleza mihla le.”
20Kodwana kwanga lokhu kungaba sibetho
esivela kuSomnini, salabo abangisolako;
iye, salabo abakhuluma okumbi ngepilwami!
21Wena Somnini, Somandla,
ngenzela lokho ngebanga lebizo lakho;
iye, ungihlenge ngebanga lokwethembeka kwakho!
22Mbala ngichakile, ngiswele
nehliziywami ihlabekile ngaphakathi kwami.
23Ipilwami inyamalala njengethunzi entambama,
ngithintithwa njengentethe.
24Amadolwami ayageba
ngebanga lokuzila ukudla;
umzimbami ukhehlile, ngimathambo.
25Sese ngisiphoqo kabangisolako
lokha nabangibonako, banikina iinhloko.
26Ngisize Somnini, Zimami!
Ngisindise ngokwethembeka kwakho!
27Benze bazi bona sisandla sakho,
nokobana wena Somnini lokho ukwenzile!
28Bona banganikelela, wena uzakubusisa!
Nabaphoqakalako ngemva kobana bangivukele,
incekwakho izakuthaba.
29Abangisolako abembathwe ziinhloni,
baphuthelwe lihlazo labo njengengubo!
30Ngomlomami ngizamthokoza khulu uSomnini;
ngimdumise phakathi kwesiqubuthu
31ngombana ujame ngesidleni soswelako,
kobana amsindise kilabo abalahle ipilwakhe.
