AMARHUBO 107

₁Bongani uSomnini ngombana ulungile

nokwethembeka kwakhe kujame isiphelani.

₂Abahlengiweko bakaSomnini abatjho njalo,

labo abahlenge esandleni somjamelani,

₃iye, labo ababuthe emazweni,

ukusuka epumalanga netjingalanga

nokusuka etlhagwini nesewula.

₄Abanye bazula erhalawumbeni,

ebhudwini bangafunyana indlela eya emzini,

iye, indawo yokuhlala;

₅balambile begodu bomile,

umphefumulwabo udambile.

₆Nje-ke esizini labo balila kuSomnini,

wabatjhaphulula ematlhuwenabo;

₇wabarhola ngendlela enqophileko

kobana baye emzini,

iye, indawo yokuhlala.

₈Abathokoze uSomnini ngokwethembeka kwakhe

nangeemangaliso zakhe ebantwini.

₉Mbala, wakholisa owomileko,

wasuthisa onephango ngokuhle.

₁₀Abanye bahlala ebumnyameni,

iye, ethunzini elesabekako;

baziimbotjhwa ezisesizini, emakhamandeleni

₁₁ngombana bahlubuka amezwi kaZimu,

banyenya iinluleko zongoPhezulu.

₁₂Badanjiswa kusebenza nzima;

bakhutjwa kwangabikhona obasizako.

₁₃Nje-ke esizini labo balila kuSomnini,

wabasindisa ematlhuwenabo;

₁₄wabakhupha ebumnyameni,

iye, ethunzini elesabekako;

wavuthula iimbopho zabo.

₁₅Abathokoze uSomnini ngokwethembeka kwakhe

nangeemangaliso zakhe ebantwini.

₁₆Mbala, wafohloza iminyango yekoporo,

wephula iinqabo zeensimbi zamasango.

₁₇Abanye baphila ngobudlhayela

ngebanga lendlela yeemphambeko zabo,

bahlupheka ngenca yamacalabo.

₁₈Imiphimbabo yanyenya koke ukudla,

batjhidela emasangweni wokufa.

₁₉Nje-ke esizini labo balila kuSomnini,

wabasindisa ematlhuwenabo;

₂₀wathumela ilizwi lakhe wabaphilisa,

wabaphephisa emgodini wokufa.

₂₁Abathokoze uSomnini ngokwethembeka kwakhe

nangeemangaliso zakhe ebantwini.

₂₂Abanikele ngemihlabelo yokuthokoza,

babike imisebenzakhe ngokuhlokoma.

₂₃Abanye behlela elwandle ngeenthayamanzi

kobana benze umsebenzi wangemihla

emanzini amanengi.

₂₄Bona babona imisebenzi kaSomnini,

iye, iimangaliso zakhe ekuzikeni:

₂₅Wakhuluma, wavusa isiwuruwuru,

wasikimisa amadlambi welwandle.

₂₆Abakhuphulela phezulu,

abuya abaphosa ekuzikeni;

engozini leyo baphakanyelwa ziimbindi,

₂₇badiyazela, batherezela njengesidakwa,

bafika kwamgodi uyagcina.

₂₈Nje-ke esizini labo balila kuSomnini,

wabakhupha ematlhuwenabo:

₂₉Wathulisa isiwuruwuru

namadlambi arhobha.

₃₀Bathaba ngombana athula,

wabaletha echwebeni abalifisako.

₃₁Abathokoze uSomnini ngokwethembeka kwakhe

nangeemangaliso zakhe ebantwini.

₃₂Abamphakamise ebandleni elikhulu,

bamdumise ehlanganweni yabaphathi.

₃₃USomnini wenza imilambo ibe lirhalawumba,

iiyalo zibe yihlabathi eyomileko,

₃₄inarha enothileko ibe libhudu

ngenca yobukhohlakali babahlali bayo.

₃₅Uphendula irhalawumba libe midzwela,

ihlabathi eyomileko ibe ziiyalo.

₃₆Lapho-ke, waphilisa abanephango,

bakha khona umuzi,

iye, indawo yokuhlala.

₃₇Barhatjha imbewu emasimini,

batjala iindiribe,

bafunyana isivuno esihle.

₃₈Lokha nababusisako, banda khulu,

akhange avume bona ifuywabo iphunguke.

₃₉Kodwana nabangabusisiko bancipha ngesibalo,

babhesa ngebanga lokugandelelwa,

iinkinga nesizi.

₄₀USomnini uthela amakhosana ngehlazo,

awenze azulazule ebhudwini elinganandlela,

₄₁kodwana uvikela abadududu ekugandelelweni,

andise imindenabo njengemihlambi.

₄₂Abaqotho bayakubona lokho bajabule;

kodwana zoke iinkhohlakali zivala umlomo.

₄₃Ohlakaniphileko uzaziyelela izintwezi;

acabange ngokwethembeka kwakaSomnini.