AMARHUBO 105

₁Bongani uSomnini, nibize ibizo lakhe;

nazise izenzo zakhe phakathi kwezizwe.

₂Mvumeleni ingoma, nimdumise;

babazani zoke iimangaliso zakhe.

₃Zikhakhaziseni ebizweni lakhe elicwengileko;

azithabe iinhliziyo zabafuna uSomnini.

₄Rhuluphelani uSomnini namandlakhe;

nifunisise ubuso bakhe njalonjalo.

₅Khumbulani iimangaliso zakhe azenzileko,

imikarisomraro nemithetho ayikhulumileko,

₆iye, nina nzukulwana zaka-Abrahamu inceku yakaSomnini,

nina bantwana bakaJakopo okhethiweko wakhe.

₇Yena unguSomnini uZimethu;

imithethwakhe yembethe iphasi loke.

₈Ukhumbula isivumelwano sakhe nini nanini

nesithembiso ayala ngaso iinkulungwana zeenzukulwana,

₉iye, isivumelwano asenza no-Abrahamu

nesifungo sakhe ku-Isaka.

₁₀Wasiqinisa kuJakopo saba simiso

nakuma-Israyeli saba sivumelwano isiphelani;

₁₁wathi: “Wena Jakopo ngizakunikela inarha yeKanana,

ibe sisabelo selifa lama-Israyeli.”

₁₂Lokha ama-Israyeli nasesembalwa ngesibalo,

aba ziinkhonzi kwesikhatjhana eKanana,

₁₃nalokha azulazula ezizweni ngezizwe,

iye ukusuka emibusweni ukuya komunye,

₁₄uZimu akhange avumele noyedwa,

bonyana awagandelele.

Wabe wakhalima namakhosi ngebanga lawo,

₁₅ngokuthi: “Ningathinti abazesiweko bami,

ningalimazi abaphorofidi bami.”

₁₆Lokha nawuthumele indlala ephasini,

nalokha nawephula umphekgho wesikwa,

₁₇wathumela umuntu phambi kwawo:

uJosefa owathengiswa njengekhoboka.

₁₈Baminyezela iinyawo zakhe ngamakhamandela,

intamakhe yafakwa ikholoro yesimbi.

₁₉Ilizwi lakaSomnini lamzizinya

ukufikela lapha isithembiso sakhe sizaliseka khona.

₂₀Ikosi uFaro yathumela

kobana athukululwe,

umbusi wabantu loyo wamtjhaphulula.

₂₁Yena wamenza umengameli wesigodlo sakhe

nombusi phezu kwepahlakhe yoke,

₂₂kobana ngelizwi nangokuthanda kwakhe

abophe iinkhulu zakaFaro,

abe afundise nabaphathi ukuhlakanipha.

₂₃Ngalokho u-Israyeli weza eGibhide;

uJakopo wahlala njengesikhonzi enarheni kaRhamu.

₂₄USomnini wandisa abantu bakhe khulu,

wabenza babanamandla

ngaphezu kwabagandeleli babo.

₂₅Waphendula iinhliziyo zabo

kobana zizonde abantu bakhe,

zibenzele ubukhwebetjhana.

₂₆Wathumela uMosi incekwakhe

kanye no-Aroni amkhethako.

₂₇Benza iimbonakaliso kumaGibhide,

iye, imikarisomraro enarheni kaRhamu.

₂₈UMosi no-Aroni azange batjhugulule amezwakhe:

Lokha uSomnini nathumela ubumnyama,

mbala kwaba nzima tshu.

₂₉Waphendula amanzawo aba ziingazi,

ukuze iinhlambi zabo zife.

₃₀Inarhawo yazala swi ngeenrhwarhwa,

ngitjho nemalawini wamakhosanawo.

₃₁Wakhuluma kwavela iwoma leembawu,

kwaba nemiyani emkhawulweni woke.

₃₂Wawehlisela isinanja esikhundleni sezulu,

kwamanyaza umbani enarhenawo,

₃₃waphohloza isidiribe namakhiwanawo,

wephula nemithi yenarhawo.

₃₄Wakhuluma kwavumbuka intethe,

iye, isikhonyani esingangobaba.

₃₅Sona sadla zoke iimila zenarhawo,

sarhiribidela iinthelo zamasimawo.

₃₆Wamadlha woke amazibulo enarhenawo,

iye, isithelo sokuthoma sobudoda bawo.

₃₇Wakhupha ama-Israyeli aphethe isiliva negolide,

akakho noyedwa phakathi kweenkoro zakhe

owararejekako.

₃₈IGibhide yajabulela ukuphuma kwama-Israyeli

ngombana besele yehlelwe kukwesaba.

₃₉USomnini wendlala ilifu

kobana libe mthunzi ngehla kwawo

nomlilo wokuwakhanyisela ebusuku.

₄₀Lokha nakhombelako, wawapha iinkwali,

iye, wawasuthisa ngokudla okuvela ezulwini.

₄₁Wavula idwala, kwageleza amanzi,

aba njengomlambo ebhudwini.

₄₂Mbala, wakhumbula isithembiso sakhe esicwengileko

asinikela ku-Abrahamu incekwakhe.

₄₃Wakhupha abantu bakhe ngokujabula,

abakhethiweko bakhe ngokuhlokoma.

₄₄Wabanikela iinarha zezizwe,

iye, bazuza umjuluko wazo

₄₅ukuze balonde iimiso zakhe,

bagcine imithethwakhe.

Haleluya!