AMARHUBO 103

Dumisa uSomnini mphefumulwami!

Iye, koke okuphakathi kwami

akudumise ibizo lakhe elicwengileko.

₂Dumisa uSomnini mphefumulwami!

Soke isirhawu sakhe ungasikhohlwa!

₃Yena olibalela woke amacalakho,

elaphe zoke izifo zakho,

₄okuhlenga uphephe emgodini wokufa,

akubusise ngokwethembeka nangomusa,

₅okuzalisa ngokuhle,

kufikela lapha waneliseka khona;

ubutjha bakho buvuseleleke njengekhozi.

₆USomnini wenza okulungileko,

boke abagandelelweko ubenzela ubulungiswa.

₇Wazisa uMosi iindlela zakhe,

iye, nama-Israyeli izenzo zakhe.

₈USomnini unomusa nesirhawu,

ubuthaka ekusilingekeni,

uzele ukwethembeka.

₉Akahlali asola;

akanghaleli kwasafuthi.

₁₀Akasiphathi njengokufanele izono zethu;

akasibuyiseleli ngokulingene amacalethu.

₁₁Njengokuphakama kwezulu ngehla kwephasi,

kungako ukwethembeka kwakhe kwabamesabako.

₁₂Njengepumalanga idedelene netjingalanga,

ngokunjalo ususa iimphambeko zethu kithi.

₁₃Njengoyise onesirhawu ebantwaneni bakhe

noSomnini unesirhawu kangako kwabamesabako.

₁₄Yena uyazi bona sibunjwe ngani,

uyakhumbula bonyana silithuli nje.

₁₅Amalanga wobhubhako anjengotjani:

Uqhakaza njengelikhwa lommango,

₁₆kodwana lokha ummoya nawulibethako, liyaphela,

indawalo lingasayazi.

₁₇Nokho ukwethembeka kwakaSomnini

kungokwanini nanini kwabamesabako

nokulunga kwakhe kungokweenzukulwana

₁₈kilabo abalonda isivumelwano sakhe,

iye, labo abakhumbula ukulandela ifundiswakhe.

₁₉USomnini unzinzise isihlalo sakhe sobukhosi ezulwini;

ubukhosi bakhe bengamele koke.

₂₀Dumisani uSomnini

nina ngilozi zakhe,

iye, nina ngorho ezinamandla

eziphelelisa imilaywakhe

ngokulalela amezwi wephimbo lakhe!

₂₁Dumisani uSomnini

nina noke mabuthwakhe,

iye, nina nceku zakhe enenza intandwakhe!

₂₂Dumisani uSomnini

nina noke mbunjwa zakhe

eendaweni zoke azibusako.

Dumisa uSomnini mphefumulwami!