IZAGA 2

₁Ndodanami, nakube wamukela amezwami,

ufihle imiyalwami ehliziywenakho,

₂indlebakho ilalele ukuhlakanipha,

welulele ihliziywakho ekuzwisiseni,

₃iye, lokha nawufisa ukwazi,

urhuwelele ubize ukuzwisisa,

₄nakube lokho ukufuna njengesiliva,

ukufunisise njengegugu elifihliweko,

₅khona-ke uzakuzwisisa ukwesaba uSomnini,

bese ufumana ukumazi uZimu.

₆USomnini unikela ukuhlakanipha,

emlonyenakhe kuvela ilwazi nokuzwisisa.

₇Ubekela abaqotho ipumelelo

usihlangu kilabo abaneendlela ezimsulwa,

₈ubulunga imizila yokulunga,

alonde indlela yabathembekileko bakhe.

₉Khona-ke uzakulemuka ukulunga,

ubulungiswa nokuhleleka,

iye, enye nenye indlela elungileko.

₁₀Mbala, ubuhlakani buzakungena ehliziywenakho,

unandiphelwe lilwazi emphefumulwenakho.

₁₁Ukuhlolisisa kuzakulonda

nokuzwisisa kukubulunge,

₁₂kukuhlenge endleleni yokonakala,

iye, ebantwini abakhuluma okuphambeneko,

₁₃kilabo abaphambuka emizileni elungileko

kobana bakhambe eendleleni zobumnyama,

₁₄bajabulele ukwenza okumbi,

bathabe ngokuphambukela ebumbini;

₁₅labo iindlela zabo zimasongesonge,

nemizilabo iyalahlekisa.

₁₆Ukuzwisisa kuzakuhlenga kunondindwa,

iye, umfazi otjhili onelimu elibutjhelelezi,

₁₇otjhiye umlingani wobutjha bakhe,

wakhohlwa isivumelwano sakhe noZimu.

₁₈Ikumbakhe yehlela ekufeni,

nemizilakhe iya kabafileko.

₁₉Boke abaya kuye ababuyi,

abasayifumani imizila yokuphila.

₂₀Ngalokho khamba ngendlela yabalungileko,

unamathele emizileni yabamsulwa.

₂₁Mbala, abaqotho bazakunzinza enarheni

nabanganamlandu bahlale kiyo;

₂₂kodwana iinkhohlakali zizakujutjwa enarheni,

nabangathembekiko basitjhulwe kiyo.