IZAGA 18

₁Umuntu onganabuntu uzifunela kwakhe,

ukhuluma kumbi ngabaphumelelako.

₂Isidlhadlha asithandi ukuzwisisa,

sizwana nokuveza imibonwaso.

₃Nakufika ubukhohlakali nokunyaza,

kulapho ihlazo liletha khona ukurhubutjhwa.

₄Amezwi womlomo womuntu amamanzi azikileko

nomthombo wokuhlakanipha umlanjana ogobhozako.

₅Akusikuhle ukukhetha ubuso kokhohlakeleko

nokubekela eqadi omsulwa ekugwebeni.

₆Iimbhena zesidlhadlha zisifaka epikiswaneni

nomlomaso usibangela ukubethwa.

₇Umlomo wesidlhadlha usichitho saso

neembhena zaso zisisifu kiso.

₈Amezwi wohlebako afana neenkhanakhana,

ehla ngesiphundu emuntwini.

₉Umuntu osidondi emsebenzinakhe,

ungumfowabo lesibhidlamnyanya.

₁₀Ibizo lakaSomnini limubhotjhongo oqinileko,

olungileko ubalekela kiwo angalalameleki.

₁₁Umnono wonjingileko ulidorobho lobuphephelo kuye,

ngokubona kwakhe uwuthatha inga mthangala ophakemeko.

₁₂Ngaphambi kobana kwehle ihlekelele

ihliziyo yomuntu inamagugwana,

kodwana ukuzithoba kulandelwa lidumo.

₁₃Ophendula angakezwa,

kubudlhadlha nehlazo kuye.

₁₄Umphefumulo womuntu uyamsekela nagulako,

kodwana ngubani ongathwala umphefumulo oqobekileko?

₁₅Ihliziyo yonengqondo izuza ilwazi

neendlebe zabahlakaniphileko zifuna ukuzwisisa.

₁₆Isipho sivulela ophako indlela,

simrholela kabakhulu.

₁₇Obika indabakhe ntange ubonakala aseqinisweni

bekufike lapha omunye amfaka khona imibuzo.

₁₈Ifumbe iqeda ipikiswano;

ilamule iinrhonga.

₁₉Umfo okhubekileko ulikhuni kunedorobho elinemithangala,

iye, ukucabana kufana nesiqabo sombhotjhongo.

₂₀Isisu somuntu sisuthiswa sithelo somlomakhe,

waneliswa mkhiqizo weembhena zakhe.

₂₁Ilimu linamandla wokuphila nokufa

nabalithandako bazakugoma isithelo sakhona.

₂₂Ofumana umfazi ufumene isipho esihle

begodu uzuza umusa kaSomnini.

₂₃Isichaka sikhuluma ngokuncenga,

kodwana injinga iphendula ngokukgharameja.

₂₄Umuntu wabangani abanengi uyaphela,

kodwana kunomngani wamambala

osekela ngcono kunomfo.