IZAGA 13

₁Umntwana ohlakaniphileko

uyamukela uyise namsolako,

kodwana isideleli asilaleli nasikhalinywako.

₂Eenthelweni zomlomakhe umuntu uzuza okuhle,

kodwana amaqili omela inturhu.

₃Olonda umlomakhe ulonda ipilwakhe;

okhulumela butjhilweni uyonakala.

₄Umphimbo wevila uyakhaluza,

kodwana awuzuzi;

wabakhutheleko uyaneliswa.

₅Olungileko uyalizonda ilizwi lekohliso,

kodwana okhohlakeleko uletha iinhloni nehlazo.

₆Ukulunga kuyamlondoloza omsulwa,

kodwana isiphambeko sihlakaza isoni.

₇Kunomuntu ozenza injinga anganalitho;

omunye azenze isichaka anjingile.

₈Umnono womuntu ungaba yihlawulo yepilwakhe,

kodwana isichaka asethuseleki.

₉Umkhanyo wabalungileko udarhile,

kodwana isibani seenkhohlakali siyacima.

₁₀Ngokuzikhukhumeza, onganahloko ubanga ukucabana;

kodwana ukuhlakanipha kuhlala nabamukela izeluleko.

₁₁Umnono ozuzwa ngokuphanga uyaphela,

kodwana obuthelelwa kancani kancani uyanda.

₁₂Ithemba eliriyadiswako ligulisa ihliziyo;

isifiso esiphumeleliswako simumuthi wokuphila.

₁₃Onyefula umyalo kuzakuba kumbi ngaye,

kodwana owuhloniphako yena, uyavuzwa.

₁₄Ifundiso yohlakaniphileko imthombo wokuphila,

ibuyisa umuntu ezifwini zokufa.

₁₅Ukuzwisisa okuhle kuveza umusa,

kodwana indlela yamaqili iyihlekelele.

₁₆Woke ovuthiweko wenza izinto ngelwazi,

kodwana isidlhadlha sizembula ubudlhadlha.

₁₇Isithunywa esikhohlakeleko siwela engozini,

kodwana esithembekileko siletha ukuphila.

₁₈Odela ukusolwa wehlelwa buchaka nehlazo,

kodwana oyelela ukukhalinywa uyahlonitjhwa.

₁₉Isifiso esiphumelelisiweko simnandi emphefumulweni,

kodwana ukudeda kokumbi

kusikghabhudlho kwabaziindlhadlha.

₂₀Okhambisana nabahlakaniphileko naye uyahlakanipha,

kodwana odlhemadlhema neendlhadlha uyahlupheka.

₂₁Ilitjhwa lilandelela izoni,

kodwana abalungileko bavuzwa ngokuhle.

₂₂Olungileko utjhiyela iinzukulwana zakhe ilifa,

kodwana umnono wesoni ubekelwa olungileko.

₂₃Isimu etlayiweko yeenhloko zemindeni

ingakhiqiza ukugoma okunengi,

kodwana ukudlokho kungathathwa ngokungakafaneli.

₂₄Obabalela iswazi uzonda umntwanakhe,

kodwana omthandako ukhuthalela ukumkhalima.

₂₅Olungileko ugoma abe aneliseke,

kodwana izisu zeenkhohlakali ziyaswela.